Лъэхъэнэ хьылъэу тызхиубытагъэр тызэгъусэхэу зэпы­тэчы, тицIыфхэм зэрарышхо къафимыхьэу, узыр къызэу­тэкIыгъэхэри хъу­жьынхэу, зэкIэми тыпсаоу ащ ты­хэкIынэу тэгугъэ. ТиIофшIа­кIохэу илъэс 65-м къехъу зыныбжьхэр шIокI имыIэу охътэ гъэнэфагъэкIэ дгъэтIысыгъэх, ау ахэм язакъоп, редакцием щылажьэрэмэ янахьыбэр Iоф­шIапIэм къэдгъакIорэп.

Узыр псынкIэу зэрэзэпахырэр, ар щынагъоу зэрэщытыр, псауныгъэм нахь шъхьаIэ зэрэщымыIэр къыдгурыIозэ ыкIи АР-м и ЛIышъхьэу КъумпIыл Мурат мы Iофыгъом фэгъэ­хьыгъэ Унашъоу къыдигъэ­кIыгъэм та­къыпкъырыкIызэ ащ фэдэ зекIуакIэр къыхэтхыгъ.

Зэпхыныгъэ амалхэр къызфэзгъэфедэн зылъэкIырэ журналистхэр унэм исхэу къытфатхэх, алъэкI къагъа­нэрэп, ау Iоф­тхьабзэу рес­публикэм щырагъэкIокIырэм ипчъагъэ къызэ­рэкIичыгъэм къыхэкIэу материалэу къагъэхьазырырэми къыщыкIагъ. Куп макIэ ты­хъоу непэ Iоф тэшIэ. Джащ пае мы уахътэм тигъэзет тедзэгъу­хэр нэкIубгъуиплIым шIомыкIы­хэу къызыщыдэдгъэкIыщт мафэхэри къыхэфэщтых, непэрэм фэдэхэу. А щыкIагъэу тиIоф­шIэн фэхъурэр къытфэжъугъэ­гъунэу, шъо, тигъэзетеджэ лъапIэхэр, тышъолъэIу. Нэу­жым, дунаир зыпкъ иуцожьмэ, нэкIубгъо пчъагъэхэр идгъэ­къужьыщтых.

Шъузэрэщыгъуазэу коронавирусым фэгъэхьыгъэ къэба­рэу къызIэкIэдгъахьэ­хэрэмкIэ игъэкIотыгъэу тигъэзет инэ­кIубгъохэмкIэ ты­къыжъудэ­гуащэ, тисайтэу adygvoice ыкIи соцсетьхэу Фейсбукымрэ Инстаграммымрэ ащытиIэ нэкIубгъохэм игъорыгъоу къа­рытэгъахьэх. А Iофыгъор тапэкIи лъыд­гъэкIотэщт.

Лъытэныгъэ къышъуфэзышIэу гъэзетэу «Адыгэ макъэм» иредактор шъхьаIэу Дэрбэ Тимур.