Тишъолъыр коронавирусым ылъэныкъокIэ Iофхэм язытет къызэрэзэIыхьагъэм фэшI зэрахьэрэ Iофтхьабзэхэр гъэлъэшыгъэнхэ фаеу Адыгеим и ЛIышъхьэу КъумпIыл Мурат ылъытагъ ыкIи ыпшъэкIэ къыдигъэкIыгъэ унашъохэм шIокI имыIэу гъэцэкIэгъэнхэ фэе зэхъокIыныгъэхэр афишIыгъэх.

– Мы узыр къапыхьанымкIэ анахь щынагъо зышъхьащытхэр зыныбжь хэкIотэгъэ ыкIи уз гъэтIылъыгъэхэр зиIэ цIыфхэр ары. А купым къыхиубытэхэрэм алъэныкъокIэ мэхьанэ зиIэ унашъо тшIыгъэ – шIокI имыIэу яунэхэм арысынхэу. Iоф зышIэрэ пенсионерхэми ар афэгъэхьыгъ. IофшIэн языгъэгъотыхэрэм сыкъышъолъэIу шапхъэхэр жъугъэ- цэкIэнхэмкIэ. ЦIыфыбэ зыщызэрэугъоирэ чIыпIэхэм тинахьыжъхэр ямыкIолIэнхэм мэхьанэшхо иI, – къыIуагъ ЛIышъхьэм.

Коронавирусыр ушъхьагъу зыфэхъугъэ охътэ гузэжъогъум непэ цIыфхэр ифагъэх. Нафэ зэрэхъугъэмкIэ, ар хэти лъыIэсын ылъэкIыщт – жъи кIи. ЦIыфхэр ащ щыухъумэгъэнхэмкIэ къэралыгъо пстэуми ищыкIэгъэ Iофтхьабзэхэр зэрахьэх.

Джыдэдэм анахь шъхьаIэу цIыфхэм зызарафагъазэрэр амал зэриIэкIэ яунэхэм къарымыкIынхэр ары. Псауныгъэр къэухъумэгъэнымкIэ, о пшъхьэ- кIи, уигупсэхэми, къыбготхэми ящыIэныгъэ къызэтегъэнэгъэнымкIэ нэбгырэ пэпчъ граждан пшъэдэкIыжьэу ыхьырэр зэхишIыкIын фае. Арышъ, шъуиунэхэм шъуарыс, зэкIэми тызэфэжъугъэсакъыжь!

Республикэм ипащэхэм зизакъоу псэухэрэ нэжъ-Iужъхэм, сэкъатныгъэ зиIэхэм Iэзэгъу уцхэр ыкIи гъомылапхъэхэр къафащэфынхэмкIэ социальнэ къулыкъухэм яIофшIэн зэкIаугъоягъ. Мыхэм апае ОНФ-м ишъолъыр отделение «или- ние плъыр» Iоф ешIэ: 8(800)-200-34-11. Волонтер-медикхэр IэпыIэгъу афэхъух.

Коронавирусым псынкIэу зызэриушъомбгъурэм къыхэкIыкIэ мы тхьамафэм къыкIоцI Iоф арагъэшIэщтэп. Ащ ишIуагъэкIэ узыр нахь зэтыраIэжэным щэгугъых. Арышъ, Адыгеим и ЛIышъхьэ цIыфхэм зафегъазэ, ежьхэри якIэлэцIыкIухэри унэм къимыкIынхэу, егъэлыягъэу къамыкIухьанэу, мэфэкI мафэхэр хамыгъэунэфыкIынхэу, гигиенэ шапхъэхэр агъэцэкIэнхэу.

Iоф зымышIэщтхэм къахиубытэхэрэп – щыIэныгъэм епхыгъэ къэкIуапIэхэр аIэкIэз- гъэхьэрэ структурэхэр, медицинэ учреждениехэр, уц щапIэхэр, гъомылэпхъэ тучанхэр, транспорт амалхэм ащыщхэр.

«Ныбджэгъу лъапIэхэр! Шъуипсауныгъэ къэтыухъумэнымкIэ Адыгеим щы- хъурэ-щышIэрэм, щызэрахьэрэ Iофтхьабзэхэм шъуащыдгъэ- гъозэныр лъыдгъэкIотэщт. Къэбарыр икъоу, анахь шъхьаIэр – шъыпкъэу къышъулъыдгъэIэсыщт. СыкъышъолъэIу, егъэлыягъэ щынэм зызIэкIешъумы- гъэубыт ыкIи къэбар нэпцIэу къекIокIыхэрэр шъушIошъ шъумыгъэхъух! Официальнэ сайтхэм къарыхьэхэрэр нахь тэрэзых. ЗэкIэми тызэгъусэмэ мы къежьэгъэ узыкIэм тыпэуцужьын тлъэкIыщт. Шъори, шъуигупсэхэми, къышъупэблагъэхэми шъузыфэсакъыжь!», - къыIуагъ КъумпIыл Мурат.