Мы узыр зиIэу зэгуцафэщтыгъэхэ нэбгыри 3-мэ арашIылIэгъэ медицинэ уплъэкIунхэу Москва арагъэхьыгъэхэм якIэуххэр къэкIожьыгъэх. COVID-19 узыр ахэм зэряIэр къагъэшъыпкъэжьыгъ ыкIи Адыгеим пстэумкIи ар нэбгыри 4-мэ яIэу агъэунэфыгъ. Ащ нэмыкIэу, коронавирусыр яIэу нэбгыри 8-мэ ягуцафэх. Зэпахырэ узхэм зыщяIэзэхэрэ республикэ сымэджэщым нэбгырэ 26-рэ чIэлъ.

Врачхэм къызэраIуагъэмкIэ, сымаджэхэм язытет зыпкъ ит, ящыIэныгъэкIэ щынагъо ашъхьарытэп, узыр къафэпсынкI.

Адыгеим ис нэбгырэ 1500-мэ мы узыр яIэмэ къахагъэщынэу ищыкIэгъэ уплъэкIунхэр адызэрахьагъэх. Сымаджэу агъэунэфыгъэхэри, зиIэу зэгуцафэхэрэр зыIукIагъэхэри, унэм исэу зылъыплъэхэрэри уплъэкIунхэм ахиубытагъэх.

Роспотребнадзорым АдыгеимкIэ и ГъэIорышIэпIэ шъхьаIэ къызэритыгъэмкIэ, коронавирусыр нахьыбэу зыдэщыIэ шъо- лъырхэу агъэунэфыгъэхэм къарыкIыжьыгъэ нэбгырэ 793-мэ, IэкIыб къэралыгъохэм – къарыкIыжьыгъэхэ 745-мэ алъэплъэх. Нэбгырэ 371-мэ алъыплъэжьыхэрэп, ащ щыщэу нэбгырэ 20-р сымаджэхэм акIэрыхьагъэх. Пэтхъу-Iутхъур ыкIи пневмониер къызэузэу къэкIожьыгъэхэ нэбгырэ 398-мэ мы уахътэм алъэплъэх, ащ щыщэу 24-р сымэджэщым чIэлъых.

Дунаим щыкъэбархэр

COVID-19-м ыпкъ къикIыкIэ зидунай зыхъожьыгъэхэм япчъа- гъэ зыщынахьыбэ къэралыгъо- хэр Италиемрэ Испаниемрэ арых. Гъэтхапэм и 27-рэ чэщ-зымафэм Италием мы узым нэбгырэ 969-рэ илIыкIыгъ, пстэумкIи – 10023-рэ. Мы мэфэ дэдэм Испанием чэщ-зымафэм 769-мэ ядунай ахъожьыгъ, пстэумкIи – 5982-рэ. КъэралыгъуитIури зэфашIыгъэх.

Аужырэ къэтынхэмкIэ, Урысыем чэщ-зымафэм коронавирусыр къызэузыгъэхэм япчъагъэ 302-рэ къыхэхъуагъ, ар шъо- лъыр 35-мэ ащагъэунэфыгъ, зы нэбгырэ дунаим ехыжьыгъ. Къалэу Москва кIэу къэсымэ- джагъэхэр – 212-рэ. Зэрэ Урысыеу пстэумкIи мы узыр зиIэу нэбгырэ 1836-рэ къыхагъэщыгъ.

ПсэупIэхэр дезинфекцие ашIых

Роспотребнадзорым АдыгеимкIэ и ГъэIорышIэпIэ шъхьаIэ къызэритыгъэмкIэ, коронавирусыр зиIэу зэгуцафэхэрэм ащыщ-хэр Мыекъуапэ иурамэу Чкаловым ыцIэ зыхьырэм тет къат 16 хъурэ унэм къычIащыгъэх. Джащ пае зэпахырэ узым пэшIуекIорэ санитарнэ Iофтхьабзэхэр подъездхэм ащызэрахьагъэх. ГъэIорышIапIэм испециалистхэм медицинэм иIофышIэхэр ягъусэхэу къакIухьэхэзэ, а унэм имызакъоу, нэмыкI псэупIэхэми, пстэуми зэдагъэфедэрэ чIыпIэхэм мыщ фэдэ Iофтхьабзэхэр щырагъэкIокIых, лабораторнэ уплъэкIунхэм апае биоматериалхэр къаугъоих. Джэхашъохэр, дэпкъхэр, пчъэ ыкIи дэкIоепIэ къопсхэр алъэкIых.

ЯIофшIэн къызэтырагъэуцуагъ

Адыгеим икъэлэ гупчэ и Оперативнэ штаб къызэриты- гъэмкIэ, гъэтхапэм и 31-м къыщегъэжьагъэу коронавирусым къалэм зыщимыушъомбгъу- ным фэшI Мыекъопэ троллейбуснэ гъэIорышIапIэм иIофшIэн къызэтырагъэуцуагъ. Троллейбус 19-у къалэм къыщекIокIыщтыгъэр джы охътэ гъэнэфагъэм нэс щытыщтых.

Къэлэ шъхьаIэм щызекIорэ общественнэ транспортыр фэдитIукIэ нахь макIэ ашIынэу автотранспортнэ предприятиехэм япащэхэм афагъэпытагъ. Маршрутнэ таксихэм Iоф ашIэщт, ау азыфагу зэпыугъохэр такъикъ 15-м нэсэу къадэфэщт. Мы гъунапкъэр пIэлъэ гъэнэфагъэм нэс зекIощт. Лъытэныгъэ зыфэтшIырэ къэ- лэдэсхэр, узым пэшIуекIохэрэ Iофтхьабзэу зэрахьэхэрэм зэхэшIыкI ыкIи пшъэдэкIыжь афышъуиIэу жъугъэцакIэх, шъу- зыкIэрыхьэрэ цIыфхэр жъугъэмакIэх, шъуиунэхэм шъуарыс!