Зэпахырэ узэу коронавирусым пэуцужьыгъэнымкIэ Оперативнэ штабэу Адыгеим щызэхащагъэм изэхэсыгъо санаториехэу «Кавказ» ыкIи «Лэгъо-Накъэ» зыфиIохэрэр COVID-19-р зиIэу агъэунэфыхэрэр зычIагъэгъолъхьащтхэ обсерваторхэр ашIынхэмкIэ яматериальнэ-техническэ зытет фытегъэпсыхьэгъэным иIофыгъохэм щытегущыIагъэх.

Адыгэ Республикэм и ЛIышъхьэу КъумпIыл Мурат къызэрэхигъэщыгъэмкIэ, мы узыр зиIэу зэгуцафэхэу объектитIум къащэщтхэм шIуагъэ къытэу зэращылъыплъэщтхэм мэхьанэ иI. Ащ дакIоу, медицинэ IофышIэхэм узыр къапамыхынымкIэ икъу фэдизэу ухъумэгъэнхэу афигъэпытагъ.

– Санитарнэ къулыкъухэм яунашъохэр шIокI имыIэу гъэцэкIэгъэнхэ фае. ЗищыIэныгъэ емыблэжьхэу Iоф зышIэрэ медицинэ IофышIэхэр къэтыухъу- мэнхэмкIэ зэкIэ щыIэ шапхъэхэр дгъэцэкIэнхэр типшъэрылъ. Анахьэу тынаIэ зытедгъэтыщтыр – зызэраухъумэщт, дезинфекцие зэрашIыщт амалхэр, Iэзэгъу уцхэр икъоу аIэкIэгъэхьэгъэнхэр, IэпэчIэгъанэ яIэныр. Тест-системэхэм якъэщэн, гъэшхэн Iофыгъохэм язэхэщэн алъэныкъокIэ, джащ фэдэу обсервацием щыIэ цIыфхэри, медицинэ IофышIэхэри зыдэщыIэщтхэмкIэ амалышIухэр афызэхэщэгъэнхэ фае. Лъып- лъэн-дэхьан режимыр пхъашэу гъэцэкIэгъэн фае, -– къыкIигъэ- тхъыгъ КъумпIыл Мурат.

Обсерваторхэр зэхэщэгъэнхэмкIэ федеральнэ ведомствэхэм къагъэнэфэгъэ шапхъэхэр къыдыхэлъытэгъэнхэу зэрэщытыр ЛIышъхьэм къыIозэ, ащ фэдэ гупчэхэр анахь макIэу нэбгырэ 250-мэ зэрателъытэгъэн фаем анаIэ тыраригъэдзагъ.

КъэIогъэн фае, IэкIыб къэралыгъохэм къарыкIыжьыгъэхэр ыкIи коронавирусыр зиIэ цIыфхэм акIэрыхьагъэхэр узыр зыщызэпахырэ пIалъэу мэфэ 14-м къыкIоцI алъыплъэнхэм фэшI обсерваторхэу агъэпсыщтхэр медикэ-санитарнэ амалхэм зэу ащыщых. Узыр иIэу къызагъэшъыпкъэжьыкIэ, а сымаджэр зэпахырэ узхэм зыщяIэзэхэрэ республикэ сымэджэщым ащэщтых.

НэкIубгъор зыгъэхьазы- рыгъэр IЭШЪЫНЭ Сусан.