Андрей ыкъоу Николай Силантьевыр къалэу Мыекъуапэ 1922-рэ илъэсым къыщыхъугъ. Я 8-рэ къэлэ еджапIэм щеджэщтыгъ. Ятэ пасэу лIагъэ ыкIи кIалэм ыплIэIу зэкIэ унэгъо Iофышхор тегъэкIагъэ хъугъагъэ. Заом ыпаIоу псэолъэшI комбинатым Iутыгъ. Гъэмафэм 1941-рэ илъэсым дзэм ащагъ.

Хэгъэгу зэошхом илъэхъан Темыр Кавказым, Украинэм, Къырым ащызэуагъ, Сапун-Iуашъ­хьэр ыкIи Севастополь пыим къыIэпыхыжьыгъэнхэм ахэлэжьагъ. Зэо гъэхъагъэхэм апаекIэ Жъогъо Плъы­жьым иорден ыкIи Щытхъум иорденэу я III-рэ шъуашэ зиIэр къыратыгъэх. ПлIэ заом къыщауIагъ, зэрэхъужьэу фронтым Iухьажьыщтыгъ. Мэздэгу къыщегъэжьагъэу Берлин нэсэу Н. Силантьевым изэо гъогу зикъудыигъ.

Гъэтхапэм и 3-м, 1945-рэ илъэсым Восточнэ Пруссием, псэупIэ чIыпIэу Хермсдорф дэжь, зыщызыгъэпытагъэхэ фашистыдзэхэр пхырычыгъэнхэ фэягъэ. Ротэм ипарторгэу, щэрыо полкэу Александр Невскэм иорден зиIэм ищэрыо дивизиеу N 2-м иотделение икомандирэу Н. А. Силантьевым макъэ къызэратэу пстэуми апэу зыкъиIэти, идзэ­кIолIхэр зэо плъырым хэтхэу атакэм ыщагъэх. Ахэр пыир зыдэлъ траншеихэм якIухи, IэпшъэзаокIэ атекIуагъэх. А чIы­пIэм отделением ико­ман­дирэу Н. Силантьевым гу къыз­лъаримыгъатэу пый пулеметым кIэрыцуахъуи гранатэмкIэ къэмыхъыежьынэу ышIыгъ, тидзэ­кIолIхэм гъогури къафызэIуихыгъагъ.

Зэошхо хьылъэм бэ щыфыкъуагъэр — командирыри, зэкIэ ротэм иофицерхэри. Джащы­гъум парторгэу Н. А. Силантьевым командованиер ежьым ыштагъ. Iушыгъэ IэпкIэ-лъэпкIагъэкIэ ротэр пыим ыкIыб ыщи, ащкIэ къикIыхэзэ, пый артиллерием утынхэр къырахынхэу аублагъ. Ащ ишIуагъэкIэ орудиищрэ, минометхэмрэ къызIэкIагъэхьагъэх. ЧырбыщышI заводри къа­Iапахыжьи, фашистхэр ухъумапIэ ямыIэжьэу къагъэнагъэх. Пыир зыкъэшIэжьыгъо рамы­гъафэу, тидзэхэр псынкIэу Хермсдорф ыкIыбкIэ къикIыхи, нэмыцхэм языкъэухъумэжьыпIэ чIыпIэу мэхьанэшхо зиIагъэр агъэтэкъуагъ. Мы заом Силантьевыр къыщауIагъ, ау пыир зэхагъэтэкъофэ зэуапIэр ащ къыбгынагъэп.

Мыекъуапэ икIэлэпIугъэ бланэ нэмыц дзэкIолIитф ышъхьэ­кIэ ыгъэкIодыгъ.

Дзэ гъэзетэу «В атаку» зыфиIоу гъэтхапэм и 17-м, 1945-рэ илъэсым къыдэкIыгъэм къыт­хыщтыгъ:

Никто не подумал бы, пожалуй, Что сила такая живет В простом и застенчивом малом, В груди неширокой его. Родная и полная жизни За ним незабвенная ширь. На прусской земле за Отчизну Дерется с врагом богатырь. Чтоб славили мы вкруговую И знали бы млад или стар Силантьева хватку крутую, Его богатырский удар.

ЛIыгъэу, псэемыблэжьныгъэу къыхэфагъэмэ апае, мэлылъфэгъум и 19-м, 1945-рэ илъэсым, Адыгэ хэкум икъэлэ шъхьа­Iэу Мыекъуапэ илIыхъужъ- дзэкIолIэу Николай Силантьевым «Советскэ Союзым и ЛIыхъужъ» зыфиIорэ цIэ лъапIэр къыфагъэшъошагъ.

Хэгъэгу зэошхом икIэух зэрэ­хэлэжьагъэм пае гвардием истаршинау Силантьевым Хэгъэгу зэошхом иорденэу я II-рэ шъуа­шэ зиIэр къыратыгъ.

Гъэмафэм, 1945-рэ илъэсым Москва ТекIоныгъэм ипарадэу щыкIуагъэм я 3-рэ зэхэт Белорусскэ фронтым исатыр хэтэу заом щыпсыхьэгъэ коммунистэу Николай Силантьевыр къырыкIуагъ, ащ ыбгъэгу Дышъэ Жъуа­гъор, зэо ордени 4-р ыкIи медалыбэр къыщышIэтыщтыгъэх.

ТекIоныгъэр къызыдах ужым старшинау Н. А. Силантьевыр игупсэ хэку къэкIожьыгъ, Мые­къуапэ щыпсэугъ. Илъэсыбэрэ щысэтехыпIэу Мыекъопэ мэзкомбинатым, ыужым псэолъэшI объединениеу «Зэкъошныгъэм» Iоф ащишIагъ. IофшIэнми щыпэрытыгъ, медальхэр мэфэкI зэфэшъхьафхэмкIэ къылэжьы­гъэх. Пенсием зэкIом, лIэужхэр патриотхэу пIугъэнхэмкIэ Iофы­шхо ышIагъ — еджапIэхэм, къа­лэм дэт предприятиехэм ащы­Iэ­щтыгъ, изэо гукъэкIыжьхэмкIэ адэгуащэщтыгъ, мамырныгъэм илъэпIагъэ кIигъэтхъыщтыгъ.

Мамырыкъо Нуриет.