Сергей Сивикьян къалэу Мыекъуапэ 1925-рэ илъэсым къыщыхъугъ. Ежь ишIоигъоныгъэкIэ илъэс 17 ыныбжьэу фронтым Iухьагъ.

Хэгъэгу зэошхом илъэхъан разведчик-саперэу я 4-рэ Украинскэ фронтым ия 394-рэ щэрыокIо дивизие ихэушъхьафыкIыгъэ сапер батальон хэ- тыгъ, нэмыц-фашистхэм язаозэ лIыблэнэгъэ ин къыгъэлъэ- гъуагъ. ШэкIогъум и 11-м, 1943-рэ илъэсым Сергей Сивикьян разведчик куп игъусэу пыим ыкIыбкIэ икIыхи, нэмыц танкхэр ыкIи нэмыц Iашэхэр зэрагъэуцугъэхэ шIыкIэхэр къызэрагъэшIагъэх. ЯIоф къагъэцэкIагъэу къэкIожьхэзэ, нэмыц патрулым къылъэгъугъэх. ТидзэкIолIхэм гранатхэр гитлеровцэхэм ахатIупщыхьагъэх ыкIи хэзыгъэ-кIодыгъэ ямыIэу, псаоу тиехэм къахэхьажьыгъэх.

Мы лIыгъэ зекIуакIэм пае Сивикьян Щытхъум иорденэу я III-рэ шъуашэ зиIэр къыфагъэшъошагъ.

Щылэ мазэм, 1944-рэ илъэсым Сергей Сивикьян джыри разведчик гъусэхэр иIэхэу пыим ыкIыб зашIыгъ, чэщ мэфищэ къэтыгъэх, гу къызлъарамы- гъатэу, зэкIэ селоу Кортица ыкIи нэмыкI псэупIэ чIыпIэхэу мыщ дэжьым щытхэм фашист пыидзэхэр зэфэдэкIэ зэрэIуагъэуцуагъэхэ шIыкIэхэр, миномет батареир къалъэгъугъ ыкIи агъэунэфыгъ, ащкIэ огъу зэпымычыжьхэр тидзэхэм пыим къыришIылIэщтыгъэх, а зэкIэм ящытыкIэ-гъэпсыкIэ тхьапэм тырашIыхьагъ, пыим лъыплъэн IофымкIэ ипункт икоординатхэр къатыгъэх. ТидзэкIолIхэр зыхэт купым мэхьанэ зиIэ къэбарыбэ къахьи къэкIожьыгъэх.

Мы кIогъум С.А. Сивикьян джыри лIыгъэ-псэемыблэжь- ныгъэ къыщигъэлъэгъуагъ ыкIи Щытхъум иорденэу я II-рэ шъуашэ зиIэр къыратыгъ.

Ащи къыщыуцугъэп разведчик ныбжьыкIэр, ящэнэрэуи пыим ыкIыб къэбарыхьэ агъэкIуагъ, инженер псэуалъэхэр зэрэщытхэр къызэригъэшIэнэу ыкIи пшъэрылъыр кIалэмрэ игъусэхэмрэ цIыф хэзыгъэ ямыIэу дэгъоу агъэцэкIагъ. Днестровскэ плацдармэм Сергей ышъхьэкIэ тIо кIуагъэ – лагъымэ шъофыр ыкIи пыим игъучIыч шIыхьа- гъэхэр зыфэдэхэр къызэригъэшIагъ, етIанэ ахэмкIэ тидзэ пхырищыгъ.

СССР-м и Апшъэрэ Совет и Президиум и УнашъокIэ гъэтхапэм и 24-м, 1945-рэ илъэсым С.А. Сивикьян апшъэрэ дзэкIолI оренэу Щытхъум иа I-рэ шъуашэ зиIэр къыратыгъ.

Мэкъуогъум, 1945-рэ илъэсым С.А. Сивикьян я 4-рэ Украинскэ полк зэхэтым щыщэу ТекIоныгъэм ипарадэу Москва щы- кIуагъэм хэлэжьагъ. Заор заухым ыуж, С.А.Сивикьян Советскэ Армием илъэситфэ къулыкъур щихьыгъ. Дзэм къызыхэкIыжьым, Мые- къуапэ къэкIожьи щыпсэугъ, дубильнэ заводым Iоф щишIагъ, рабочэу ригъажьи, директорым игуадзэ нэсыгъагъ, 1971-рэ илъэсым идунай ыхъожьыгъ. ТекIоныгъэр къытфыдэзыхыгъэхэм ащыщ, шъхьащэ фэтэшIы.

Мамырыкъо Нуриет.