Адыгеим илэжьэкIо-псэ- уакIохэм афэлъэкIырэр Хэгъэгу зэошхом ТекIоныгъэр къыщыдэхыгъэнымкIэ зыгори къатенагъэп: «псэр атызэ, напэр ащэфыгъ».

Пчъагъэхэм къаIуатэ адыгэхэм ялIыгъэ-псэемыблэжьныгъагъэр: тичIыпIэгъу нэбгырэ мин 80-м нахьыбэ дзэ зэфэшъхьафхэм ыкIи партизан отрядхэм ахэтхэу фашизмэм пэшIуекIуагъэх, езэуагъэх. Ахэм ащыщэу нэбгырэ мин 30 фэдиз хэгъэгум, лъэпкъым акъохэр ыкIи апхъухэр нэмыц-фашистхэм язаохэзэ, лIыгъэшхо зэрахьэзэ фэхыгъэх. Хэгъэгу зэошхом ифронт зэфэшъхьафхэм зэфэдэкIэ тихэку икIыгъэ цIыф лъэпкъ зэфэшъхьафхэр ащызэуагъэх. Ахэм ащыщэу нэбгырэ 41-мэ «Советскэ Союзым и ЛIыхъужъ» зыфиIорэ щытхъуцIэ иныр къафагъэшъошагъ.

Нэбгырэ 15-р орденэу Славэм икавалер шъыпкъэ хъугъэх, минипшI пчъагъэхэм зэо орденхэр ыкIи медальхэр къафагъэшъошагъэх.

Тихэгъэгушхоу СССР-гъэр фашизмэм тезыгъэкIуагъэр, ТекIоныгъэм, мамырныгъэм ыкIи шъхьафитныгъэм ятхъагъо къязыгъэгъэзэжьыгъэр советскэ народым – зэкIэ къэралыгъом щыпсэухэрэ цIыф лъэпкъхэм языкIыныгъэ-псэемыблэжьныгъ, ялIыгъэшху, шIулъэгъу гъунэнчъэу щыIэныгъэм фыряIэр ары. Нахьыжъхэм ялIыгъэ-цIыфыгъэ, нахьыкIэхэм ягъогугъ: кIэлэеджэкIо цIыкIухэми Родинэм пае пфимыкIыкIыщтхэу, зэмыблэжьыщтхэр къахэкIыгъэх: ахэр ЛIыхъужъ цIыкIухэу Мыекъуа- пэкIэ я 8-рэ гурыт еджапIэм щеджэщтыгъэу Женя Поповыр, Мыекъопэ районымкIэ Надя Гнездиловар, зэшхэу Федя ыкIи Коля Токаревхэр, Юра Сазоновыр, мыхэм анэмыкIхэри.

ЦIыкIуи, ини ящэч ыкIи ялIыхъужъныгъэ мыжъом нахь пытагъ. Къэрэмыхъужь ныбжьи ащ фэдэ тхьамыкIэгъо гуих!

Мамырыкъо Нуриет.