Адыгэ Республикэм и ЛIышъхьэу КъумпIыл Мурат зэпахырэ узэу «Коронавирус Covid-19» зыфиIоу зэрэдунаеу зэлъызыкIугъэм зимыушъомбгъуным, цIыфэу тишъолъыр исхэр щыухъумэгъэнхэм, къызэузыщтхэм япчъагъэ хэмыхъоным афытегъэпсыхьэгъэ унэшъо гъэнэфагъэхэр ышIыгъэх.

Спорт, зыгъэпсэфыпIэ ыкIи джэгупIэ учреждениехэр зэрэзэфашIыгъэхэм, цIыфыбэ зыхэлэжьэрэ Iофтхьабзэхэр зэрэзэпагъэугъэхэм анэмыкIэу, джыри унэшъо тедзэхэр республикэм ипащэ къыгъэнэфагъэх.

Ахэр анахьэу зыфытегъэпсыхьагъэхэр зыныбжь илъэс 65-м къехъугъэхэр унэм рагъэсынхэр ары. Зызыщагъэдэхэрэ салонхэм, хьакIэщхэм ыкIи нэмыкIэу зычIэсынхэ алъэкIыщтхэм, зыгъэпсэфыпIэ ыкIи санаторнэ-курортнэ Iэзэным ипсэуалъэхэм кIощт цIыфхэм пэшIорыгъэшъэу чIыпIэхэр арамыгъэубытыныр. Ресторанхэм, кафехэм, шхапIэхэм общественнэ гъэшхэн фэIо-фашIэр зэпагъэуныр. Ахэм шхыныгъохэр ачIахынхэ фитых. Къэлэ паркыр, зызыщагъэпсэфырэ гупчэхэр цIыфхэм къамыкIухьэхэмэ нахь тэрэз.

ГъэIорышIэкIо компаниехэм ыкIи щэпIэ организациехэм дезинфекцие Iофтхьабзэхэр игъом рагъэкIокIынхэу афагъэпытагъ.

— Мыщ фэдэ Iофтхьабзэхэр зытегъэпсыхьагъэхэр республикэм щыпсэухэрэми, къакIохэрэми зэпахырэ узыр къапымыхьаныр ыкIи зиушъомбгъуным ищынагъо щыгъэзыегъэныр ары. ТиIахьыл-гупсэхэм, тинахьыжъхэм тафэсакъыныр, къэтыухъумэнхэр, IэпыIэгъу зищыкIагъэм тыдеIэныр типшъэрылъ шъхьаI, — къыIуагъ Къум­пIыл Мурат.

Шъугу къэдгъэкIыжьын, коронавирусым пэуцужьыгъэнымкIэ Оперативнэ штаб республикэм щызэхащагъ. Ащ чэщ-зымафэм Iоф ешIэ. Федеральнэ гуп­чэм къыгъэнэфэрэ унашъохэр министерствэхэм, ведомствэхэм ыкIи муниципалитетхэм япащэхэм яшIэ зэхэ­лъэу агъэцэкIэнхэм штабыр фэIорышIэ. Пшъэрылъ шъхьаIэр — коронавирусым земыгъэушъомбгъугъэныр.

Гъэтхапэм и 27-м къатыгъэ къэбарымкIэ, зэпахырэ узхэм зыщяIэзэхэрэ Адыгэ рес­публикэ клиническэ сы­мэджэщым нэбгырэ 20 чIагъэгъолъхьагъ, 7-мэ коронавирусыр яIэу егуцафэщтыгъэх. Ахэм ащыщэу зым а узыр иIэу агъэу­нэфыгъ. Мы мафэм ехъулIэу унэм исхэ нэбгырэ 517-мэ япсауныгъэ лъэплъэх. ПстэумкIи нэбгырэ 1088-рэ ауплъэкIугъ.

Къулыкъу зэфэшъхьафхэм яIофшIэкIэщтыр

Къихьащт тхьамафэр (гъэтхапэм и 30-м къыщегъэжьагъэу мэлылъфэгъум и 5-м нэс) мыIофшIэгъу ма­фэхэу щытынэу УФ-м и Президент ыгъэнэфагъ. Мыщ дэжьым къамыкIухьэу, уз щынагъоу къежьагъэм зыщаухъумэным пае унэхэм пстэури арысынхэ фае. АщкIэ нэбгырэ пэпчъ пшъэдэкIыжьэу ыхьырэр зэхишIыкIынэу щыт. Хэти ышъхьэ имызакъоу, адрэхэмкIи изекIуакIэ зыфэдэщтым мэхьанэ иI.

Коронавирусым зимыушъомбгъуным фэшI бэдзэршIыпIэхэр мыгъомылапхъэ­хэр зыщэхэрэ чIыпIэхэр, шхапIэхэр, зыгъэпсэфыпIэхэр, еджэпIэ зэфэшъхьафхэр, спорт гупчэхэр зэфашIых.

Адыгэ Республикэм псауныгъэр къэу­хъумэгъэнымкIэ и Министерствэ къызэ­ритыгъэмкIэ, медицинэ учреждениехэм Iоф ашIэщт. Ау мыгузэжъогъу дэдэмэ, пэшIорыгъэшъ уплъэкIунхэр щыжъугъэзы­ехэмэ нахьышIу. Шъуипсауныгъэ изытет къызэщыкъомэ, IэпыIэгъу псынкIэм шъу­къедж. Пэтхъу-Iутхъум шъузигъэгумэ­кIыкIэ, шъузэпхыгъэ поликлиникэм ирегистратурэ шъутеу. Дежурнэ врачыр шъуа­дэжь къэ­кIощт, ищыкIагъэмэ, шъузэ­рэсымаджэмкIэ тхьапэр къышъуфызэIуихыщт.

Псауныгъэр къэухъумэгъэнымкIэ Министерствэм «илиние плъыр» шъузэ­рэтеощтыр: 8-800-200-52-59.

Зэпахырэ узхэм зыщяIэзэхэрэ сымэ­джэщыр госпиталь шIыкIэм тырагъэ­хьагъ, коронавирусыр къызэутэкIыгъэу зэгуцафэхэрэр ащ чIэлъыщтых. Адрэ сымаджэу ащ чIэлъыгъэхэр медицинэ учреждениеу Мыекъуапэ дэтхэм (зэфэшIыгъэ отделениехэр хахыгъэх, чIэхьэпIэ шъхьаф яIэщт) агъэкIощтых. ЗыгорэкIэ коронавирусым тишъолъыр зыщиушъомбгъумэ, къэлэ сымэджэщэу къати 9-у зэтетыр сымаджэхэр чIагъэгъолъхьаным фагъэхьазыры. Нэбгырэ 209-рэ чIэфэщт.

Iудзыгъэ IофшIакIэм техьэх

Адыгэ Республикэм хэгъэгу кIоцI IофхэмкIэ и Министерствэ гъэтхапэм и 27-м къыщегъэжьагъэу цIыфхэр ригъэб­лэгъэщтхэп.

Ау ялъэIухэр, зыгъэгумэкIырэ упчIэхэр почтэ амалхэр, электроннэ шIыкIэр къыз­фагъэфедэхэзэ фагъэзэнхэ алъэ­кIыщт.

Ащ пае МВД-м исайт ихьанхэшъ, едзыгъоу «Прием обращений граждан и организаций» зыфиIорэм ялъэIу щатхын фае.

«ШъунаIэ тешъотэгъадзэ, бзэджэшIагъэхэр ыкIи хэбзэукъоныгъэр шъуалъэныкъокIэ зэрахьэхэмэ, дежурнэ частым е телефонэу 02-м шъуатеу» — къы­тыгъ Адыгеим и МВД ипресс-къулыкъу.

ЗефэнымкIэ фитыныгъэ къыдэзыхыщтхэм яушэтын

Адыгеим и Къэралыгъо автоинспекцие иподразделениехэм къэралыгъо фэIо-фашIэхэр электроннэ шIыкIэм тетэу цIыфхэм афагъэцэкIэщтых.

Водитель хъущтхэр езыгъэджэхэрэ организациехэм инспекцием зэпхыныгъэ дыряIэу, экзамен зытыщт купхэр агъэ­мэкIэщтых. Транспорт амалхэр тхыгъэн­хэмкIэ пIалъэхэр зыукъуагъэхэм пшъэ­дэкIыжь арагъэхьыщтэп.

Транспорт амалхэм алъэныкъокIэ зэхъокIыныгъэхэр электроннэ шIыкIэм тетэу Къэралыгъо автоинспекцием ежъу­гъэшIынхэм фэшI шъуилъэIухэр зыдэжъу­гъэхьыщт адресыр: tehnadmkp01@mvd.ru (Мыекъуапэ).

Псауныгъэм шъузэре­шIушIэщтыр

Мыщ фэдэ уахътэм шхыныгъоу цIыфым зэрихьылIэхэрэм мэхьанэшхо яI. ГъомылэгъэткIу гъэпсыкIэм иIофшIакIэ зыпкъ итыным ыкIи иммунитетыр гъэпытэгъэным афэшI витаминхэр ыкIи минералхэр бэу зыхэлъ хэтэрыкIхэр шъушхынхэ фае. Ахэр зэрэцIынэхэми гъэжъуагъэхэми хъущтых. Клетчаткэ грамм 20 (джэнчыр, горохыр, чечевицэр) непэ пкъынэ-лынэм хэхьанэу щыт.

Мэхьанэшхо зиIэхэм ащыщ псы бэу уешъоныр. Мафэм литрэ 1,5-м нахь мымакIэу. Щай шхъуантIэр, къэкIырэ уцхэм ахэгъэжъукIыгъэ псыхэри (шъоущыгъу ахэмылъэу) мыщ къыхеубытэх. Кофе, щэр, хьантхъупсыр халъытэхэрэп.

Сыхьати 6-м нахь мымакIэу цIыфыр чэщ-зымафэм чъыенэу щыт.

Щэм хэшIыкIыгъэ гъомылапхъэхэр игъо шъыпкъэх. Анахьэу щхыу, кефир, айран зыфэпIощтхэм яшIуагъэ къэкIо. Жьы къабзэм ухэтын фае.

Вирусым пэшIуекIохэу аIозэ шъон пытэ ешъохэрэр хэукъох. Специалистхэм ащыщхэм къызэраIорэмкIэ, пэтхъу-Iутхъур шъон пытэм ыгъэхъужьырэп, иягъэ нахь къэкIо.

Iэшъынэ Сусан.