Урысые Федерацием и Президентэу Владимир Путиным УФ-м и Федеральнэ ЗэIукIэ фигъэхьыгъэ Джэпсалъэм къыпкъырыкIыхэзэ ыкIи сабый зиIэ унагъохэм яхахъо нахьыбэ шIыгъэным фэшI къэралыгъом ипащэ иунашъоу «Унагъохэу сабый зэрысхэм къэралыгъо IэпыIэгъу ягъэгъотыгъэным фытегъэпсыхьэгъэ амал тедзэхэм афэгъэхьыгъ» зыфиIорэр аштагъ.

Ащ къыдыхэлъытагъэу мы илъэсым ищылэ мазэ и 1-м къыщегъэжьагъэу шъолъырхэм яхэбзэгъэуцугъэ диштэу илъэси 3-м къыщыублагъэу 7-м нэс зыныбжьхэм мазэ къэс ахъщэ тынхэр аратыщтых.

Сабыир рыпсэунымкIэ шъолъырым щагъэнэфэгъэ ахъщэ анахь макIэм ипроцент 50 мазэ къэс аратыщт. Илъэ­сым иятIонэрэ квартал телъытагъэу урыпсэунымкIэ ахъщэ анахь макIэу шъолъырым щагъэнэфагъэм унагъом ихахъохэр (зы нэбгырэм телъытагъэу) шIомыкIыхэ зыхъукIэ мы тыныр сабыим IукIэщт. АдыгеимкIэ 2020-рэ илъэсым аратыщтыр сомэ 4799,5-рэ мэхъу.

УФ-м и Президентэу Владимир Путиным къэралыгъом и Правительствэ пшъэрылъ фишIыгъ мы тыныр зэраратыщт шIыкIэм, шъолъырхэм субсидиер зэраIэкIэхьащтым шапхъэу пылъхэр мэлылъфэгъу мазэм ехъулIэу агъэнэфэнхэу.

Илъэси 3-м къыщегъэжьагъэу 7-м нэс зыныбжь кIэлэцIыкIухэм ахъщэ тынэу афэкIощтым пае сомэ миллион 426-рэ мин 666-м ехъу федеральнэ ахъщэу республикэм къыфэкIощт. Мы тыныр сабый 7483-мэ аIукIэщт.

2020-рэ илъэсым бэдзэогъум и 1-м ыуж ары тхылъхэр зяшъухьылIэнхэ шъулъэ­кIыщтыр. Электроннэ шIыкIэм тетэу къэралыгъо фэIо-фашIэхэм япорталкIэ заявлениер жъугъэхьын амал шъуиI е МФЦ-м зыфэжъугъэзэн шъулъэкIыщт.

Гъонэжьыкъо Сэтэнай.