Адыгеим ичIыгулэжьхэм гъэтхасэхэм мыгъэ гектар 102657-рэ арагъэубытынэу агъэнэфагъ. Ахэм яхэлъхьан езыгъэжьагъэхэр ахэтых.

Джэджэ районым ичIыгулэжьхэр ары анахьыбэу гъэтхэ лэ­жьыгъэхэр хэзылъхьащтхэр. Гектар 26351-рэ ахэм арагъэубытын гухэлъ яI. Ау ахэр ощххэм агъэохъугъэх, джыри пхъэныр рагъэжьагъэп. Анахь макIэу гъэтхасэхэм языгъэубытыщтыр Адыгэкъал, пстэумкIи гектар 833-рэ агъэнэфагъэр. Мыщ ичIыгулэжьхэми джыри лэжьыгъэр халъхьэгорэп.

АР-м мэкъу-мэщымкIэ и Министерствэ тызэрэщигъэгъозагъэмкIэ, гъэтхэсэ хьэр, зэн­тхъыр ыкIи илъэсыбэм къэкIыжьырэ уцхэр ары мы мафэхэм чIыгум рагъэкIухэрэр. Анахьыбэу хэзыгъэкIыгъэр Кощхьэблэ районым ичIыгулэжьхэр ары. Ахэм агъэнэфагъэр пстэумкIи гектар 16610-рэ мэхъу, 870-р ары халъхьагъэр. Ащ щыщэу зэнтхъыр гектар 520-рэ, гъэтхэсэ хьэу 350-рэ апхъыгъ.

Шэуджэн районым гъэтхэсэ гектар 13900-у щагъэнэфагъэм щыщэу 586-р апхъыгъ. Ащ инахьыбэр, 356-р зэнтхъы, илъэ­сыбэм къэкIыжьырэ уцхэр гектар 50 мэхъу.

Мыекъопэ районым ичIыгулэжьхэм гъэтхасэу агъэнэфагъэр бэп, гектар 6282-рэ ныIэп зэрэхъурэр, ау процентхэмкIэ къэплъытэмэ, ахэм нахьыбэу хагъэкIыгъ. Тыгъуасэ министерствэм къызэритыгъэмкIэ, проценти 6-р, ар гектар 374-рэ, халъхьэгъах. Нахьыбэр, 211-р, илъэсыбэм къэкIыжьырэ уц, зэнтхъыр 163-рэ мэхъу. Ом изытет ыгъэохъугъэх Красногвардейскэ, Теуцожь ыкIи Тэхъутэмыкъое районхэм ячIыгулэжьхэри, ахэр гъэтхасэхэм япхъын джыри ыуж ихьагъэхэп.

Джащ фэдэу мыгъэ Iуахы­жьынэу бжыхьэсэ гектар 115388-рэ Адыгеим ичIыгулэжьхэм халъхьагъ. Министерствэм къызэрэщаIуагъэмкIэ, ахэм язытет егъэразэх. Бжыхьасэхэм чIыгъэшIухэр ятIонэрэу аратыгъэх. Пхъэныр рамыгъажьэзэ ар аухыгъ. ХЪУТ Нэфсэт.