ПенсиехэмкIэ фондым имыеу, къэралыгъо бюд­жетым къыхэхыгъэу пенсие къызэраты­хэрэм, социальнэхэри ахэтэу, проценти 6,1-рэ къафыхагъэхъуагъэу мэлылъфэгъум и 1-м къыщыублагъэу къаратынэу рагъэжьэщт. Адыгеим щыпсэоу ар зынэсыщтыр нэбгырэ 9600-рэ. Ахэм ащыщэу 9100-мэ социальнэ пенсие къараты.

Социальнэхэм адакIоу Хэ­гъэгу зэошхом хэлэжьагъэхэм, радиацием ыкIи техногеннэ хъугъэ-шIагъэхэм яягъэ зэкIыгъэхэм, ахэм яунагъохэм арысхэм, летчик-ушэтакIохэм, нэмыкIыбэхэм япенсиехэри индексацие ашIыщтых. Къызахахъорэм ыуж социальнэ пенсиехэр, гурытымкIэ лъытагъэу, сомэ 8947-рэ зэрэхъущтыр. КIэлэцIыкIу сэкъатхэм е ицIыкIугъом къыщыублагъэу апэрэ купым хэхьэрэ сэкъатныгъэ зиIэхэм къафакIорэр, ари гурытымкIэ лъытагъэу, сомэ 13454-рэ чапыч 64-рэ хъущт. Дзэм къулыкъу щихьызэ шъобжэу тещагъэ хъугъэм сэкъатныгъэ хэзыхыгъэхэм къаратырэр сомэ 30687-м, Хэгъэгу зэошхом хэлэжьагъэхэм къафакIорэр сомэ 38311-м анэсыщтых.

Нахь пасэу IофшIапIэ Iумыт пенсионерхэм япенсиехэр проценти 6,6-кIэ индексацие ашIыгъэх. Илъэсэу къихьагъэм ищы­лэ мазэ и 1-м къыщыублагъэу ащ тетэу къараты. Къызахахъом ыуж гъэнэфагъэу къафакIорэр сомэ 5686-рэ хъугъэ, пенсионнэ коэффициентым ыуасэ 93-м нэсыгъ. ГурытымкIэ Адыгеим ис пенсионерхэм къаратырэм сомэ 690-рэ чапыч 59-рэ къы­хэхъуагъ, гурытымкIэ лъытагъэу, пенсиер зэрэхъугъэр сомэ 13465-рэ чапыч 51-рэ.

Джащ фэдэу федеральнэ фэгъэкIотэнхэр зиIэхэм мазэ къэс къафэкIорэ ахъщэ тыныр ыкIи социальнэ фэIо-фашIэхэм ауасэ проценти 3-кIэ индексацие ашIыгъэу мэзаем и 1-м къыщыублагъэу къараты. Сомэ 1155-рэ чапычи 6-м ар нэсыгъ.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.