Непэ зэрэдунаеу анахь зытегущыIэ­хэрэ къэбарыр коронавирусыр ары. Тэри тиредакцие ащ епхыгъэу сайт зэфэшъхьафхэм къарыхьэхэрэм защегъэгъуазэ, тигъэзет еджэхэрэм алъытэгъэIэсы. Ащ епхыгъэу зы къэбар игугъу къышъу­фэтшIы тшIоигъу.

Зэпахырэ узыр къызежьагъэм къыщегъэжьагъэу зыхэм сатыу ащ рашIы, адрэхэм шIу къыра­лэжьы. Узым зыщыухъумэгъэным­кIэ апэрэу медицинэ маскэхэм ягъэ­федэн къыхагъэщыгъ. Ахэр шIэхэу гъотыгъуае тыди щыхъугъэх, цIыфхэм ядаохэр къыраIотыкIыхэу аублагъ.

Ау къуаджэу Еджэркъуае мыщ хэкIыпIэ къыщыфагъотыгъ. ПсэупIэм исайтэу tut_egeruhay зыфи­Iорэм къыригъэхьагъ ащ щыпсэурэ Бжьэц Фатимэ @fatima_bzheceva хэкIыпIэу къыгъоты­гъэр.

Фатимэ зэрэкIэлэегъаджэм имызакъоу, лъэпкъ ыкIи джырэ шъуашэхэр IэпэIасэу афэзыдырэ цIыфэу зэлъашIэ. Ащ ежь ишIоигъоныгъэкIэ IэпыIэгъу афэхъунэу администрацием риIуагъ ыкIи чэщ-зымафэм къыкIоцI медицинэ маскэ 60 афидыгъ. Ащ нэмыкIэу Еджэркъое гурыт еджапIэм иуб­лэпIэ классхэм ащыщ фэхъун маскэхэр шъхьафэу афидыгъэх. МыщкIэ ыпкIэ хэти Iихыгъэп.

Сыд фэдэрэ къиныгъо къыкъо­кIыгъэми, цIыфхэр зэкъоуцохэу зызэдеIэжьхэкIэ, псынкIэ къафэхъущт. Фатимэ ишIушIагъэ къетэжьынэу фэтэIо! Псауныгъэ пытэ Тхьэм зэкIэми къытет!

Iэшъынэ Сусан.