Лэгъо-Накъ – Гъозэрыплъ
2020 — 2021-рэ илъэсхэм къушъхьэ гъогоу «Гъозэрыплъ — Лэгъо-Накъ» зыфаIорэм игъэпсын сомэ миллиардым ехъу тырагъэкIодэщт. Адыгеим ипащэхэм къызэраIорэмкIэ, мы илъэсым гъогушIхэм сомэ миллион 445-рэ, къэкIорэ илъэсым миллион 778-рэ къафатIупщыщт.
Гъогоу агъэпсырэм километри 10-м ехъу икIыхьагъ. Ащ тикъушъхьэхэм апхырыкIыхэрэ турмаршрутхэр зэрипхыщтых. ЦIыфкIуапIэхэу Шъхьэгуащэ инэпкъ зандэхэр, псэупIэу ХъымыщкIэй, поселкэу Гъозэрыплъэ, къэуцупIэу «Партизанская поляна», къушъхьэ тешъоу Лэгъо-Накъэ, Азишскэ гъочIэгъыр зэрипхыщтых, «Золотое кольцо Адыгеи» зыфиIорэ гъогоу ар республикэмкIэ тиIэ хъущт.
Лэгъо-Накъэ икIэу Гъозэрыплъэ нэсэу ашIырэ гъогум щыщэу километри 2-м ехъур хьазыр.
— Ахъщэу къытфатIупщыгъэмкIэ гъогум игъэпсын лъыдгъэкIотэщт, —къыщиIуагъ Адыгеим и ЛIышъхьэу КъумпIыл Мурат 2019-рэ илъэсым правительствэм ыгъэцэкIэгъэ Iофыгъохэм зэфэхьысыжьхэр афишIыхэзэ зичэзыу зэхэсыгъоу Къэралыгъо Советым — Хасэм иIагъэм. — ГъогукIэм къушъхьэтхыхэр зэрэзэрипхыщтхэм фэшъхьафэу чIыпIэ къэбзэ дахэу тиIэхэр зэрагъэлъэгъунхэу къакIохэрэ цIыфхэр машинэхэмкIэ благъэу ахэм аращэлIэнхэ алъэкIыщт.
Проектым игъэцэкIэн 2018-рэ илъэсым рагъэжьагъ. Зы илъэскIэ гъогум щыщэу километри 2 агъэпсыгъ, ар метрэ минрэ ныкъорэкIэ хы шъхьашъом нахь лъаг. ИкIыгъэ илъэсым километри 4,5-кIэ гъогур лъагъэкIотагъ, ащ ишIын сомэ миллион 555-рэ пэIуагъэхьагъ.
Шъолъырым псэолъэшIынымкIэ, транспортымкIэ ыкIи псэупIэ-коммунальнэ хъызмэтымкIэ и Министерствэ къызэриIорэмкIэ, 2021-рэ илъэсым гъогоу ашIырэр километри 9,8-м нагъэсыщт.
Адыгеим ипащэ социальнэ-экономическэ хэхъоныгъэхэр шIыгъэнхэр туризмэм нахь зызэрэрагъэушъомбгъущтым репхых. Ащ пае тикъушъхьэхэу зыгъэпсэфыным тегъэпсыхьагъэхэм узэрадэкIоещт гъогур, псыр, газыр ащагъэфедэхэ зыхъукIэ, илъэс псаум зыгъэпсэфакIохэр зэпамыгъэоу къэкIощтых. ГъогушIхэм 2014-рэ илъэсым IофшIэнхэу рагъэжьагъэхэр лъагъэкIуатэх. Илъэситфым къыкIоцI агъэпсыгъэ инфраструктурэм сомэ миллиарди 2,5-рэ халъхьэгъах. Мылъкур федеральнэ ыкIи республикэ бюджетхэм къахагъэкIы.
Шъаукъо Аслъангуащ.