Кощхьэблэ районым пхырыкIырэ псыхъоу Лабэ гъатхэрэ псыр къыдэкIэу, губгъом илэжьыгъэшIапIэхэмрэ цIыфхэм яхатэхэмрэ акIахьэу бэрэ мэхъу.

Ащ фэдэ гумэкIыгъом цIыфхэр хэмыфэжьынхэм пае псыхъом инэпкъхэр рагъэпытэнхэу сомэ миллион 54-рэ мыгъэ къафатIупщыгъ.

Мылъкур федеральнэ ыкIи шъолъыр бюджетхэм къахагъэкIыгъ, ар илъэсым ыкIэм нэс агъэфедэн фае. Мы Iофыгъом пылъ къэбарыр Адыгэ Республикэм тыкъэзыуцу­хьэрэ дунаимрэ чIыопсым ибайныгъэхэмрэкIэ и гъэ­IорышIапIэ ипащэу Сергей Колесниковым ТАСС-м лъигъэIэсыгъ.

Псыхъо нэпкъхэр гъэ­пытэгъэнхэмкIэ феде­ральнэ гупчэр IэпыIэгъу къытфэхъунэу зыкIэлъэ­Iугъагъэхэр 2014-рэ илъэ­сыр ары. Дамбэм ишIын пылъ проект-сметэ тхылъхэм ягъэхьазырын аухыгъ. Тапэрэ илъэсхэм псыр къызэрэдэмыкIынэу агъэпытагъэхэ чIыпIэхэр щы­Iэх. Мыгъэ псэупIэу Вольнэм къыпэблэгъэ псы- хъо нэпкъхэм ягъэпсын пылъыщтых. Ащ феде­ральнэ гъогури пхырэкIы. С. Колесниковым къы­зэриIорэмкIэ, районым къыфатIупщыгъэ ахъщэр зэрэщытэу ащ пэIуагъэ­хьащт.

Псыхъохэм языкъэIэ­тыгъо къэблагъэ. Ахэр нэпкъхэм къызэрадэмыкIынхэу гъэпытэгъэнхэу, ищыкIэгъэ Iофыгъор агъэ­цэ­кIэнэу Адыгеим ипащэхэм тызхэт илъэсым сомэ миллиони 103-рэ къатIупщыщт.

Метеорологхэм къызэраIорэмкIэ, апэ псыхъо­хэм гъэтхапэм ыкIэм къа­хахъоу рагъэжьэщт. Къушъхьэхэм ателъ осыр къэжъущт. ЯтIонэрэу псы­хъохэр нэпкъым къызыдэкIынхэ алъэкIыщтыр жъоныгъуакIэм иаужырэ мафэхэм къащегъэжьа­гъэу бэдзэогъум ыкIэм нэс. А лъэхъаныр ары мы­лылъэхэр къэжъухэу зырагъажьэрэр.

Мы мафэхэм Адыгеим ипсыхъохэр рэхьатых, псэу адэтыр шапхъэхэм атекIырэп.

Шъаукъо Аслъангуащ.