Мы узыр псынкIэу цIыфыбэмэ зэралъыIэсырэм къыхэкIэу, ащ зыщытыухъумэным фэшI зе­кIокIэ-шIыкIэу зетхьан фаеу къэралыгъо хэбзэ къулыкъухэм къаIохэрэр шIокI имыIэу дгъэцэкIэнхэу щыт. Анахь шъхьаIэр — амал зэриIэкIэ цIыфыбэ зыщызэрэугъоирэ чIыпIэхэм защышъудзый, ренэу шъуIэхэр шъутхьакIых, IаплI зэшъумы­-щэкI.

Мэлылъфэгъум и 12-м нэс гъэсэныгъэм иучреждениехэр, нэжъ-Iужъхэр зыщаIыгъхэрэ, культурнэ Iофтхьабзэхэр зыщыкIохэрэ унэхэр зэфашIыгъэх.

Непэ Iофхэм язытет

Гъэтхапэм и 22 — 23-рэ чэщ-зымафэм Урысыем коронавирусым анахь зыщигъэсымэ­джагъэхэр къалэу Москва. Ар нэбгырэ 71-мэ алъыIэсыгъ ыкIи пстэумкIи Урысыем зэпахырэ узыр нэбгырэ 438-мэ къахагъэ­щыгъ. Москва нэбгыри 191-мэ а узыр яIагъэмэ, джы пчъагъэр 262-м нэсыгъ.

Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем къы­зэриIуагъэмкIэ, коронавирусыр тишъолъыр къыщыхагъэщыгъэп. Мы уахътэм нэбгыри 322-мэ алъэплъэх. Ащ щыщэу 314-р — унэм исых, 8-р — пэтхъу— Iутхъу яIэу сымэджэщым чIэлъых. Нэбгырэ 61-мэ тхьамэфитIо залъэплъэхэ нэуж медицинэ уплъэкIунэу арашIылIа­гъэхэм узыр ямыIэу къызагъэлъагъом, карантиныр атырахыжьыгъ.

Оперативнэ штаб зэхащагъ

Коронавирусым зиушъомбгъу­ным пэшIуекIорэ Оперативнэ штабэу министерствэхэм ыкIи ведомствэхэм, муниципалитетхэм япащэхэр зыхэхьагъэхэр тишъолъыр щызэхащагъ. Ащ чэщи мафи Iоф ешIэ. Адыгеим и ЛIышъхьэу КъумпIыл Мурат къызэрэхигъэщыгъэмкIэ, пшъэ­рылъ шъхьаIэр коронавирусым зырамыгъэушъомбгъуныр ары. Ащ пае пэшIорыгъэшъ амалхэм яусагъэх, пстэури гъэлъэшыгъэ шIыкIэм тырагъэхьагъэх.

Джащ фэдэу республикэм ис нэжъ-Iужъхэу Интернетым иамалхэр зымыгъэфедэшъухэу, икъоу къэбарыр зылъымыIэсхэрэм анаIэ атырадзэнэу, ахэм IэпыIэгъу афэхъугъэным волонтер-медикхэр къыхагъэлэжьэнхэу Адыгеим и ЛIышъхьэ афигъэпытагъ.

Сымэджэщи 6-р хьазырых

Адыгэ республикэ клиническэ, зэпахырэ узхэм зыщяIэзэхэрэ, Мыекъопэ, Тэхъутэмыкъое, Красногвардейскэ район гупчэ сымэджэщхэр ыкIи Адыгэкъалэ дэт сымэджэщыр гъэлъэшыгъэ шIыкIэм тетэу Iоф ашIэным фэхьазырых.

Джэджэ район сымэджэщыр чIыпIи 100-м телъытэгъэ обсерватор ашIыным ыуж итых. Iэзэгъу уцхэр, дезинфекцие зэрашIыхэрэр ыкIи зызэраухъу­мэщт амалхэр нахьыбэу зэрагъэгъотых, агъэтIылъых.

«Линие плъырыр»

Мы уахътэм анахьэу зыфэгумэкIыхэрэр зыныбжь хэкIотагъэу мобильнэ амалхэр зыфэмыгъэIорышIэхэрэр ары. Урысые общественнэ движениеу «Народный фронт» зыфиIорэм «Росконгрессым» и Фонд, волонтер гупчэхэм я Ассоциацие, псауныгъэр къэухъумэгъэным ылъэныкъокIэ «Волонтер-медикхэр», ПАО-у «Ростелекомыр» иIэпыIэгъухэу зыныбжь илъэс 60-м шIокIыгъэхэм апае «линие плъыр» ытIупщыгъ. Ащ шъузэрэтеон шъулъэкIыщт номерыр: 8(800)-200-34-11.

Мы купым къыхиубытэ­хэрэр а номерым теонхэшъ, анахь ящыкIэгъэ пкъыгъо­хэр, гъомылапхъэхэр, Iэ­зэгъу уцхэр къафащэфынхэмкIэ ялъэIу щатын алъэ­кIыщт.

Джащ фэдэу Адыгеим и ЛIышъхьэ иуна­шъокIэ чIыпIэ зэфэшъхьафхэм къарыкIыжьыгъэхэм уплъэ­кIунхэр акIунхэм фэшI «линие плъырэу» номер зыкI зиIэр къызэIуа­хыгъ: 8-800-200-52-59.

Iофтхьабзэу «Зэ­кIэми тызэгъус»

«Коронавирус COVID-19» зыфиIорэм пэуцужьынхэм фэшI гъэтхапэм и 21-м къыщегъэжьагъэу Iофтхьабзэу «ЗэкIэми тызэгъус» зыфиIорэр Урысыем щатIупщыгъ. Пандемием ип­-лъыр-стырыгъо лъэхъан нэ­мыкIхэм IэпыIэгъу афэхъу зышIоигъо пэпчъ мыщ хэлэжьэн ылъэкIыщт.

Ащ пае сайтэу «мывместе2020.рф» зыфиIорэм уихьанышъ, узыхахьэ пшIоигъо едзыгъор къыхэпхыщт. ГущыIэм пае, «Предложить помощь», «Стать волонтером» зыфиIохэрэр, нэмыкIхэри.

ОНФ-р, общественнэ движениеу «Волонтеры-медики» зыфи­Iорэр ыкIи волонтер гупчэхэм я Ассоциацие проектым икIэщакIох.

Мы уахътэм компаниешхохэм «линие плъырхэр» етIупщыгъэу зэхащэх. Ахэм яшIуагъэкIэ юридическэ упчIэжьэгъухэр щыIэх. Джащ фэдэу Iудзыгъэ IофшIэным ыкIи онлайн шIыкIэм тетэу егъэджэнхэм япхыгъэ ыпкIэ зыхэмылъ сервисхэм ахэхьашъунхэу агъэпсы.

Iэшъынэ Сусан.