Роспотребнадзорым къызэритырэмкIэ, зыныбжь илъэс 60-м ехъугъэхэм коронавирусыр къяолIэныр нахь щынагъоу щыт. Ахэм яиммунитеткIэ ащ фэдэ вирусыр зэрэкъиным къыхэкIэу, тхьабыл плъыр-стыр узыр (пневмониер) е нэмыкI уз хьылъэ къафихьын ылъэкIыщт.

Коронавирусыр къызэузыгъэ цIыфым благъэу уекIуалIэмэ, гущыIэм пае, къэпсыгъэмэ е къэпскагъэмэ, инфекциер къыпыпхынкIэ щынагъо. Ащ фэшI нахьыжъхэр цIыфыбэ зыщызэхахьэрэ чIыпIэхэм нахь макIэу ащыIэхэмэ, общественнэ транспортыр нахь макIэу агъэфедэмэ нахьышIу. ЩапIэхэр, фэIо-фэшIэ зэфэшъхьафхэр зыщагъэцэкIэрэ гупчэхэр, нэмыкI организациехэр нахь макIэу къакIухьанхэ фае. Гъомылапхъэхэм е нэмыкIэу ящыкIагъэр къащэфыщтмэ, коммунальнэ фэIо-фашIэхэм апкIэ атыщтмэ, яIа­хьыл-гупсэхэр е социальнэ IофышIэхэр къадеIэнхэ алъэкIыщт.

Нахьыбэрэ аIэхэр атхьакIынхэ фае, къэбзэныгъэм мэхьанэшхо иI. Урамым укъытекIыжьыгъэмэ, общественнэ чIыпIэ горэм ущыIагъэу унэм укъихьажьыгъэмэ, сабынкIэ зыптхьакIыныр шIокI зимыIэ Iоф. ПIэхэр шIойхэу унэгу уеIэжьы хъу­щтэп, вирусыр пкъышъолым хэбгъэ­хьанкIэ щынагъо. ПIэ птхьакIынэу амал щымыIэмэ, инфекциер зыукIырэ уц зыхэлъ салфеткэ зыдэпIыгъэу ащкIэ пIэхэри, пкъыгъоу пIыгъхэри плъэкIынхэ фае.

ЗыгорэкIэ укъэсымэджагъэмэ, пэтхъу— Iутхъум имызакъоу, нэмыкI горэм укъы­гъэгумэкIыгъэми, ор-орэу поликлиникэм умыкIоу, врачым укъеджэмэ нахьышIу. ШъуиIахьыл-гупсэхэм ащыщ IэкIыб къэрал къикIыжьыгъэу пэтхъу-Iутхъур къеузыгъэмэ, благъэу шъуемыкIуалI.

ЗэкIэми шъусакъ, псауныгъэ шъуиIэнэу тышъуфэлъаIо!

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.