ШIэжьым итамыгъэу щыт
Хэгъэгу зэошхом текIоныгъэ къызщыдахыгъэр мыгъэ илъэс 75-рэ зэрэхъурэм фэгъэхьыгъэ Дунэе Iофтхьабзэу «ШIэжь чъыгхат» зыфиIорэр тыгъуасэ Адыгэ Республикэм щырагъэжьагъ. АР-м мэзхэмкIэ и ГъэIорышIапIэ Дунэе Iофтхьабзэм иапэрэ едзыгъо Мыекъопэ, Красногвардейскэ, Шэуджэн районхэм ягурыт еджапIэхэм, джащ фэдэу республикэм имэз фонд ичIыпIэхэм ащызэхищагъ.
Мыекъопэ районым ит станицэу Къурджыпс щыкIогъэ Iофтхьабзэм хэлэжьагъэх ведомствэ зэфэшъхьафхэм яIофышIэхэр, волонтерхэр ыкIи общественнэ организациехэр, студентхэр ыкIи еджэпIэ лесничествэхэр. Джащ фэдэу шIоигъоныгъэ зиIэхэр зэкIэ къырагъэблэгъагъэх.
Пэублэм АР-м мэзхэмкIэ и ГъэIорышIапIэ ипащэ игуадзэу Сергей Гавришовым къызэриIуагъэмкIэ, 2019-рэ илъэсым Iоныгъом и 17-м УФ-м и Президент унашъоу ышIыгъэм къыпкъырыкIыхэзэ Дунэе Iофтхьабзэу «ШIэжь чъыгхат» зыфиIорэр зэхащэ. 2020-рэ илъэсым гъэтхапэм и 18-м къыщегъэжьагъэу мэкъуогъум и 22-м нэс Хэгъэгу зэошхом хэкIодагъэхэм яшIэжь фэгъэхьыгъэу тиреспубликэ зэкIэмкIи чъыг миллиони 5 фэдиз щагъэтIысынэу агъэнафэ.
АР-м мэзхэмкIэ и ГъэIорышIапIэ Къурджыпс лесничествэм иIофышIэхэр ыкIи волонтерхэр игъусэхэу станицэу Къурджыпс имэзгъэтIысыпIэу гектар 1,6-рэ хъурэм чъыгэе лъэпкъышIухэр зытекIыщтхэ чъыг цIыкIухэу «Черешчатый» зыфиIорэм фэдэу мини 5-м ехъу агъэтIысыщт. Джащ фэдэу Краснооктябрьскэ къоджэ псэупIэм, ащ дэт гурыт еджапIэм, Шэуджэн районым, Красногвардейскэ районым ит къуаджэу Улапэ, селоу Еленовскэм адэтхэ еджапIэхэм чъыгэе плъыжьыр ащагъэтIысыщтых.
Iофтхьабзэр республикэм едзыгъуитIоу щыкIощт. Мазэм къыкIоцI Адыгеим имуниципалитетхэм зэкIэми чъыг цIыкIу мин 25-рэ ащагъэтIысыщт. Чъыг цIыкIухэр мыекъопэ лесничествэм ипитомник къыщагъэкIыгъэх, ахэм илъэси 2 — 3 аныбжь.
ЗэхэщакIохэм къызэраIорэмкIэ, чъыг пэпчъ шIэжьым ыкIи мамыр лIэужхэм ярэзэныгъэ тамыгъэу щыт. Акциеу «ШIэжь чъыгхат» зыфиIорэр Хэгъэгу зэошхом хэкIодагъэхэм, хэгъэгум иухъумакIохэм яшIэжь агъэлъэпIэным, къыткIэхъухьэхэрэ лIэужхэм яхэгъэгу шIу алъэгъоу пIугъэнхэм афэIо- рышIэ.
КIАРЭ Фатим. Сурэтыр Алла Загуменновам тырихыгъ.