ЦIыфхэр гумэкIыгъо хэзыдзэгъэхэ зэпахырэ узэу Китаим къыщежьагъэр къызэутэкIыгъэ Адыгеим непэкIэ къыщыхагъэщыгъэп. Арэу щытми, анахьэу унаIэ зытебдзэн фае­хэм афэгъэхьыгъэу Адыгэ Республикэм псау­ныгъэр къэухъумэгъэнымкIэ иминистрэу Мэ­рэтыкъо Рустем гущыIэгъу ты­фэхъугъ.

— Адыгеим и ЛIышъхьэ иуна­шъокIэ пэшIорыгъэшъ Iофтхьабзэу зетхьан фаехэр зэкIэ дгъэцэкIагъэх. IэкIыб къэра­лыгъохэм къарыкIыжьыгъэ нэ­бгырэ 64-мэ мы уахътэм та­лъэплъэ, ахэм ащыщэу 3-р сы­мэджэщым чIэлъых, нэбгырэ 48-мэ карантиныр атырахыжьыгъ. Унэм исхэм адэжь мафэ къэс терапевтхэр макIох, ауплъэкIух, зищыкIагъэхэм больничнэхэр къафызэ­Iуахыгъэх, — къыIуагъ ащ.

Мыхэм афэдэ Iофтхьабзэхэр зыкIызэрахьэхэрэр зыго­рэкIэ IэкIыбым щыIэхэу коронавирусыр зиIэ цIыфым IукIагъэхэмэ, къыпахын алъэкIыщтышъ ары. Тихэгъэгу къэ­кIо­жьырэр зыIукIэщтыр нахь агъэ­макIэ, мэфэ 14-м къыкIоцI лъэплъэх, а уахътэм узыр къэ­нафэ. ЦIыфхэм ящынэгъончъагъэ мыр тегъэпсыхьагъ.

ШъузэрэзекIощт лъэбэкъуиблыр

1. Общественнэ чIыпIэхэр нахь макIэу къэшъукIухьэх: щэпIэ гупчэхэм, спорт ыкIи нэмыкI Iофтхьабзэхэм, об­щественнэ транспортэу цIыфыбэ зэрысым амал зэриIэкIэ защышъудзый.

2. Общественнэ чIыпIэм шъузыкIокIэ, медицинэ мас­кэхэр жъугъэфедэх, сыхьати 2 — 3 тешIэ къэс зэблэшъу­хъухэзэ.

3. Пэтхъу-Iутхъум инэша­нэ­хэр зиIэ цIыфхэм амал зэри­IэкIэ благъэу шъуакIэрымыхь, зэрысхэ унэм шъуимыхь.

4. Унэм шъукъызэрихьа­жьыгъэм тетэу сабынкIэ шъу­Iэхэр шъутхьакIых.

5. Гаджетхэр, оргтехникэр ыкIи нэмыкI пкъыгъохэу шъузаIэхэрэр дезинфекцие шъушIых.

6. ЗэIукIэгъу IаплIещэкIхэр ыкIи Iэпэубытхэр нахь жъугъэмакIэх.

7. Къэбзэныгъэм ипкъы­гъохэр шъхьадж ежь иеу ыгъэфедэнхэ фае.

«Линие плъырыр»

Гъэтхэпэ уахътэу ом изытет зэпымыоу зыщызэблихъурэм цIыфхэм пэтхъу-Iутхъур ыкIи гриппыр къяутэкIыхэу хабзэ. Ащ пае шъущтэнэу щытэп, ащ къикIырэп коронавирусыр къы­шъоузыгъэу. Поликлиникэхэм зафэжъугъэзэн шъулъэкIыщт, игъом ищыкIэгъэ IэпыIэгъур шъуагъэгъотыщт.

«Линие плъырым» Iоф ешIэ, шъузыгъэгумэкIырэ упчIэхэм яджэуапхэр мы телефон номерхэмкIэ къызIэкIэжъугъэ­хьанхэ шъулъэкIыщт: АР-м псау­ныгъэр къэухъумэгъэнымкIэ и Министерствэ — 8(8772) 53-49-97 (чэщ-зымафэм Iоф ешIэ), Роспотребнадзорым и ГъэIорышIапIэу Адыгеим щыIэм — 52-12-05 (IофшIэгъу уахътэм).

Тучан мэкIайхэр аунэкIых

ЦIыфхэр егъэлыягъэу зэрэщынагъэхэм къыхэкIыкIэ етIупщыгъэу тучан мэкIайхэр аунэ­кIых: крупэхэр, консервэхэр ыкIи хъызмэтым нахь щагъэфедэрэ пкъыгъохэр ащэфых. Урысыем сыд фэдэрэ лъэны­къокIи щыкIагъэ щымыIэнэу гъомылапхъэхэр къыдэзыгъэ­кIыхэрэм ыкIи къэзыщэхэрэм зэпымыоу къаIо нахь мышIэми, тапэкIэ къэхъущтым тещыны­хьэхэзэ цIыфхэр мэщафэх. А егъэлыегъэ щынэным сыдэущтэу упэшIуекIощта?

Психологхэм къызэраIорэмкIэ, цIыфым иакъыл зэрэгъэ­псыгъэр ары — щынагъо горэ щыIэу зызэхихыкIэ гум регъэкIу. Ащ шIуагъэу хэлъыр — щыIэныгъэм, псауныгъэм щынагъо ашъхьарыт зыхъукIэ, зыкъыгъэ­гъунэжьынэу фежьэ. Адрэ лъэ­ныкъомкIэ — къэбар гомыIоу къатыхэрэм зэпымыоу яджэхэзэ, Iофым нахь анаIэ тырадзэ. Егъэлыягъэу щынэр къызате­кIокIэ, язекIуакIэхэм алъыплъэ­жьышъухэрэп.

ЯтIонэрэ купым хэхьэх щынагъо щымыIахэу зылъытэхэрэр. Дунаим а хъугъэ-шIагъэр темы­хъухьэу къашIуагъэшIы. ГумэкIыгъоу хэлъыр икъу фэдизэу зэрэзэхамышIэрэм къыхэкIыкIэ пшъэдэкIыжь зыхэмылъ зекIуа­кIэхэр къахэфэх, карантиныр аукъо. Зэпахырэ узым пэуцу­жьышъунэу зыгорэм елъытэмэ, игъунэгъум арэущтэу къы­шIошIырэп. Мы уахътэм Iофым изытет Iэпэдэлэл пшIынэу щы­тэп, гъунэпкъэ гъэнэфагъэ иIэу узекIонэу щыт.

Ау ащ къикIырэп мэзэ пчъа­гъэм уищыкIэгъэщт гъомылапхъэ пщэфыныр, егъашIэм пфэ­хъуни зэбгъэгъотышъущтэп. Зе­кIокIэ-гъэпсыкIэ пстэуми шап­хъэ яIэнэу щыт.

Тучан ыкIи щэпIэ чIыпIэхэу къэткIухьагъэхэм, гущыIэгъу ты­зыфэхъугъэ цIыфхэм гупшысэ зэфэшъхьафхэр тагъэшIы­гъэх.

Тучанышхохэу «Лента» ыкIи «Магнит» зыфаIохэрэм мэфэ заулэхэм защытплъыхьагъ. Коронавирусым икъэбар жъугъэу къызежьэгъэ тхьамафэм ана­хьыбэу макаронхэр ыкIи консервэхэр ары ащэфыгъэхэр. Ау игъорыгъозэ мэ­кIайхэм продукциер къа­рагъэуалIэ, нэкI дэдэхэу пфэIощтэп. Ау нахь зэхапшIэу уасэхэр къызы­хэхъогъэ гъомылапхъэхэр ахэтых.

Татьяна Кочет­ковар, пенсием щыI, илъэс 68-рэ ыныбжь: — Дунаим къыщытэджыгъэ гумэкIыгъом икъэбар мэфэ реным зыщэсэгъэгъуазэ. КъызгурэIо щынагъоу пылъыр. Ау ащ пае гъомылэпхъабэ сщэфэу згъэтIылъырэп. Сиза­къоу сызэрэпсэурэр къыдэс­лъытэзэ, нахь сищыкIэгъэнэу слъы­тэрэр зэсэгъэгъоты. МэкIэ-макIэу, ау бэрэ сэщафэ.

Зэшъхьэгъусэхэу Наталья ыкIи Владимир, илъэситIу зыныбжь сабый аIыгъ: — Коронавирусым ищынагъо зэ­хэтэшIыкIы. ЦIыф­хэр етIупщыгъэу зэрэщафэхэрэри тэлъэгъушъ, дэим темыгупшысэнэу хъурэп. Мары ма­тэу тIыгъым илъхэр шъолъэгъу, на­хьыбэу къэтщэ­фыгъэр сабыим ищыкIэгъэщтхэр ары. Шъыпкъэр пIощтмэ, тщэфы хабзэу щытыгъэм нахьыбэ джы къэтштагъ. Уасэхэр къызэрэ­дэкIоягъэхэр зэхэтшIагъ.

Хэбзэ къулыкъухэм янэплъэгъу ит

Дунэе финанс бэдзэршIыпIэм изытет къызэрэзэIыхьа­гъэм къы­хэкIыкIэ экономикэм хэхъоныгъэ ышIыным ыкIи социальнэ зыпкъитыныгъэм афэ­IорышIэрэ Iофтхьабзэ мэкъу-­мэщымкIэ Урысыем и Министерствэ пхырещы. Ащ ипшъэ­рылъ шъхьаIэр — федеральнэ ыкIи шъолъыр кIуачIэхэр зэхэлъхэу зыпкъитыныгъэм фагъэ­IорышIэныр.

Адыгэ Республикэм шъолъыр оперативнэ штаб щызэхащагъ. Ащ хэхьагъэх экономикэ хэ­хъоныгъэмкIэ ыкIи сатыумкIэ Министерствэм илIыкIохэр. Шъо­лъырым ит сатыушIыпIэ сетьхэм продукциеу ыкIи уасэу ачIэлъхэр зыфэдизым мафэ къэс штабыр лъыплъэщт.

Iэшъынэ Сусан.