Хэгъэгу зэошхом ТекIоныгъэ къызщыдахыгъэр мыгъэ илъэс 75-рэ зэ­рэхъурэм ипэгъокIэу Дунэе Iофтхьабзэу «ШIэжь чъыгхат» зыфиIорэр гъэтхапэм и 11-м рагъэжьагъ. Чъыг пэпчъ шIэжьым ыкIи мамыр лIэужхэм ярэзэныгъэ тамыгъэу щыт. УФ-м чIыопс къэкIуапIэхэмкIэ ыкIи эколо­гиемкIэ и Министерствэ, мэз хъызмэтымкIэ Федеральнэ агентствэм ыкIи федеральнэ къэралыгъо бюджет учреждениеу «Рослесинфорг» зыфи­Iорэм яIэпыIэгъукIэ Дунэе Iоф­тхьабзэу «ШIэжь чъыгхатэм» кIэщакIо фэхъугъэх Урысые общественнэ движениеу «Волонтеры Победы» зыфиIорэмрэ ТекIоныгъэм идзэпащэхэм яшIэжь Фондрэ.

2020-рэ илъэсым гъэтхапэм и 18-м къыщегъэжьагъэу мэ­къуогъум и 22-м нэс Хэгъэгу зэошхом хэкIодагъэхэм яшIэжь фэгъэхьыгъэу тикъэралыгъо зэкIэмкIи чъыг миллион 27-рэ фэдиз щагъэтIысхьанэу агъэ­нафэ.

Гъэтхапэм и 20-м АР-м мэз­хэмкIэ и ГъэIорышIапIэ Дунэе Iофтхьабзэм иапэрэ едзыгъо Мыекъопэ, Красногвардейскэ, Шэуджэн районхэм ягурыт еджа­­пIэхэм, джащ фэдэу респуб­ликэм имэз фонд ичIыпIэхэм ащызэхищэщтых. ЗэкIэмкIи чъыг лъэпкъ зэфэшъхьаф 5400-рэ агъэтIысхьанэу агъэ­нафэ. Iоф­тхьабзэм хэлэжьэщтых ведомствэ зэфэшъхьафхэм яIофы­шIэхэр, волонтерхэр ыкIи общественнэ орга­низациехэр, сту­дентхэр ыкIи еджэпIэ хъыз­мэтшIапIэхэр.

Iофтхьабзэм хэ­лэжьэнхэу фаехэр зэкIэ къы­рагъэблагъэх.

Акциеу «ШIэжь чъыгхат» зыфиIорэр Хэгъэгу зэошхом хэкIодагъэхэм, хэгъэгум иухъу­макIохэм яшIэжь агъэлъэпIэным, къыткIэхъухьэрэ лIэужхэм яхэгъэгу шIу алъэгъоу пIугъэнхэм афэIорышIэ.

Iофтхьабзэм мурад шъхьаIэу иIэр чъыгхэм ягъэтIысхьанкIэ мэхьанэ зиIэ социальнэ проектым зыкIыныгъэ ахэлъэу цIыфхэр къещэлIэгъэнхэр, общественнэ, волонтер ыкIи доб­ровольческэ организациехэр зэгъусэхэу чанэу хэгъэлэжьэгъэнхэр ары.

(Тикорр.).