Къолъхьэ тын-Iыхыным пэшIуекIогъэнымкIэ IофшIэныр зэрифэшъуашэу зэхэщэгъэным фэгъэзэгъэ республикэ комиссием зичэзыу зэхэсыгъоу тыгъуасэ иIагъэр Адыгэ Республикэм и ЛIышъхьэу КъумпIыл Мурат зэрищагъ.

Къолъхьэ тын-Iыхын нэшанэ зиIэ хэбзэукъоныгъэхэм алъэныкъокIэ пэшIорыгъэшъ Iоф­тхьабзэхэм язэхэщэн 2019-рэ илъэсымкIэ зэфэхьысыжьэу фэхъугъэхэм ыкIи мы илъэсымкIэ пшъэрылъ шъхьаIэу щытхэм афэгъэхьыгъэу къэгущыIагъ къолъхьэ тын-Iыхыныр ыкIи нэ­мыкI хэбзэукъоныгъэхэр пэшIорыгъэшъэу щыгъэзыегъэнхэм фэгъэзэгъэ ГъэIорышIапIэу АР-м и ЛIышъхьэ дэжь щызэхэщагъэм ипащэу ОелIыкъо Юрэ. Ащ къызэриIуагъэмкIэ, блэкIыгъэ илъэсым къэралыгъо къулыкъушIэ 16-мэ алъэныкъокIэ игъэкIотыгъэ уплъэкIунхэр рагъэкIокIыгъэх.

Зэтыгъо къэралыгъо ушэтынхэм язэхэщэн ыкIи апшъэрэ еджапIэхэм ныбжьыкIэхэр ачIэ­хьанхэмкIэ шапхъэхэм адиштэу къулыкъушIэхэм яIофшIэн агъэ­псыным, къолъхьэ тын-Iыхыным пэшIуекIогъэнымкIэ пшъэрылъ шъхьаIэхэр гъэнэфэгъэнхэми зэ­хэсыгъом щатегущыIагъэх. Мы Iофыгъом епхыгъэу къэгущы-Iагъ АР-м гъэсэныгъэмрэ шIэныгъэмрэкIэ иминистрэу КIэрэщэ Анзаур. Зэтыгъо къэралыгъо ушэтынхэр щынэгъончъэу атынхэм, къолъхьэ тын-Iыхыным ылъэныкъокIэ хэбзэгъэуцугъэр укъуагъэ мыхъуным япхыгъэу Iофэу ашIагъэхэм министрэр къатегущыIагъ. Ащ къызэриIуагъэмкIэ, анахьэу анаIэ зытырагъэтыхэрэм ащыщ кIэлэеджа­кIохэм ыкIи ны-тыхэм зэтыгъо къэралыгъо ушэтыным шапхъэу пылъхэр къафаIотэныр, психологическэу ащ фагъэхьазы­рынхэр.

Адыгэ къэралыгъо университетым ыкIи Мыекъопэ къэралыгъо технологическэ университетым яректорхэр зэхэсыгъом къыщыгущыIагъэх. Ахэм къызэраIуагъэмкIэ, апшъэрэ учреждениехэм зэрачIахьэхэрэр унаIэ зытебгъэтын фэе лъэныкъохэм ащыщ. МыщкIэ IофшIэнэу ашIэ­рэм университетхэм япащэхэр къатегущыIагъэх.

— Къолъхьэ тын-Iыхыным тыпэшIуекIоныр пшъэрылъ шъхьаIэхэм ащыщ, къэралыгъом ылъапсэ гъэпытэгъэным ар фэIорышIэ. Мы лъэныкъом­кIэ анахьэу тынаIэ зытетын фаер гъэсэныгъэм исистем ары. Республикэм кIэлэцIыкIу технопаркэу «Кванториум», шъолъыр гупчэу «Полярис-Адыгея» зыфиIохэу къыщызэIутхыгъэхэм пшъэрылъ шъхьаIэу яIэр шIэныгъэ ку­ухэр ныбжьыкIэхэм зэрагъэгъотыныр ары. Республикэм иот­раслэ зэфэшъхьафхэм Iоф ащызышIэщт специалистхэм ягъэхьазырынкIэ апшъэрэ еджапIэхэм пшъэдэкIыжьы-шхо зэрахьырэр зыщагъэгъу­пшэ хъущтэп, — къыIуагъ КъумпIыл Мурат.

ЧIыпIэ зыгъэIорышIэжьыпIэхэм къолъхьэ тын-Iыхыным пэшIуекIорэ хэбзэгъэуцугъэр зэрагъэцакIэрэм зэхэсыгъом щытегущыIагъэх ыкIи ащ епхыгъэ унашъо ашIыгъ.

Гъонэжьыкъо Сэтэнай.