Зэпахырэ узэу «коронавирус COVID-19» зы­фиIорэм икъэбар зэрэдунаеу щызэлъа­шIагъ, а гумэкIыгъом цIыфхэр зэлъиубытыгъэх.

Ар зылъыIэсырэ къэралы­гъохэм, къызэузхэрэ цIыфхэм япчъагъэ мафэ къэс хэхъо. Зэхъо­кIыныгъэхэр къэбар жъугъэм иамалхэм къарэхьэ. Тыдэ зыбгъэзагъэми, коронавирусым икъэбар нэмыкI зэхэпхырэп, ау ащ епхыгъэу къаIорэ пстэури шъыпкъэ пIон плъэкIыщтэп. Къэбар нэпцIхэр жъугъэу къы­зэрыхьэхэрэр социальнэ хъы­тыухэр ары. Ахэр зэкIэ шъу­шIошъ шъумыгъэхъух! Офи­циальнэ сайтхэм къэбархэу арытхэм шъуяджэмэ нахь тэрэз.

НепэкIэ нафэр

Узыр зэрэзэпахырэ шIыкIэу мы уахътэм агъэунэфы­гъэр цIыфэу къызэузыгъэм ащ инэшанэхэр имыIэми, укIэ­рытыгъэ зыхъукIэ къыпыпхын зэрэплъэ­кIыщтыр ары. А пIалъэр мэфи 4 — 14 фэдиз. МазэкIи къызы­хамы­гъэщыгъи агъэу­нэфыгъ.

Мы уз бзаджэм нэшэнэ гъэ­нэфагъэхэр иIэхэу щытэп, пэтхъу-Iутхъур е гриппыр къызэ­утэкIыгъэ цIыфыр зыгъэгумэкIыхэрэм афэд: тем­пературэр къыдэкIуае, чъыIалIэ къыреты, ышъхьэ мэузы, пскэ гъушъэ иI, чыир мэузы, къарыунчъэ мэхъу.

Коронавирусым пэшIуекIохэу Iэзэгъу уцхэр джыри щыIэгохэп, арышъ, зыгорэкIэ ащ фэдэ уц нэпцIхэр къышъуащэнхэу зыфежьэхэкIэ, шъуямыдэIу! Гриппым зэреIэзэхэрэ шIыкIэхэр непэ агъэфедэх.

Урысыем къэсыгъ

Анахь зэлъикIугъэ къэра­лы­гъохэу алъытэхэрэр: Китаир, Италиер, Иран, Къыблэ Кореер, Франциер…

Урысыем и Роспотребнадзор къызэритыгъэмкIэ, тикъэралыгъо зэпахырэ узыр нэ-бгыри 114-мэ къыщяутэкIыгъ (пчъа­гъэм зызэблехъу), 5-р — хъу­жьыгъэ, зыми идунай ыхъо­жьыгъэу агъэунэфыгъэп. Уплъэ­кIун 122854-рэ ашIыгъ.

Адыгеим щагъэунэфыгъэп

Адыгэ Республикэм псау­ныгъэр къэухъумэгъэнымкIэ и Министерствэ къызэритыгъэмкIэ, мы уахътэм ехъулIэу ко­ронавирусыр къеутэкIыгъэу Адыгеим зыпари щагъэунэфыгъэп.

IэкIыб къэралыгъохэм къа­рыкIыжьхи къэкIожьыгъэхэм карантин атыралъхьагъ.

Мы уахътэм ахэм ащыщхэм джыри алъэплъэх, нэбгырэ 46-м атырахыжьыгъ. Республикэм щыпсэухэрэр анахьэу зытещыныхьэхэрэр къэралыгъо зэфэшъхьафхэм къарыкIыгъэхэ студентхэр ары. Ахэм алъэныкъокIэ медицинэ уплъэкIун гъэнэфагъэхэр зэра­хьэх. Псауныгъэм зэрар езы­хыщт Iофыгъо ахэм къапы­кIырэп.

Роспотребнадзорым Адыгэ РеспубликэмкIэ и ГъэIорышIапIэ къызэритыгъэмкIэ, икIыгъэ тхьамафэм пэтхъу-Iутхъур ыкIи гриппыр къяузыгъэу нэбгырэ 635-рэ атхыгъ, ар процент 72,6-кIэ эпидемием ишапхъэу агъэнэфагъэм нахь макI.

ЗэфашIыгъэх

Коронавирусым ищынагъо къыхэкIыкIэ Адыгеим ыкIи Краснодар краим ябыслъымэн­хэм я диндэлэжьапIэ иуна­шъокIэ гъэтхапэм и 17-м къыщегъэжьагъэу мэлылъфэгъум и 20-м нэс мэщытхэм яIофшIэн зэпагъэугъ.

Анахьэу ар зыфэгъэхьыгъэр бэрэскэшхо нэмазшIыгъоу цIы­фыбэ къызэкIуалIэрэр, факультативнэ егъэджэнхэр, лекцие-­хэр ыкIи нэмыкI Iофтхьабзэ-­ хэу цIыфыбэ зыхэлажьэхэу мэ­щытым щырагъэкIокIыхэрэр амышIыгонхэр ары.

Джащ фэдэу, Адыгэ къэралыгъо ыкIи Мыекъопэ техно­логическэ университетхэр зэфашIыхи, Iудзыгъэ шIыкIэм тетэу рагъэджэнхэм техьагъэх.

Урысые Федерацием про-све­щениемкIэ и Министерствэ къы­зэритыгъэмкIэ, урысые еджа­­пIэхэм гъэтхапэм и 23-м къыщегъэжьагъэу мэлылъфэ-гъум и 12-м нэс зыгъэпсэфыгъо уахътэр рагъажьэ. Iудзыгъэ шIыкIэм тетэу кIэлэеджа­кIохэр рагъэджэнхэмкIэ амалхэм яусэщтых.

Социальнэ псэолъэ зэфэ­шъхьафхэм, спорт еджапIэхэм яIофшIэн гъунапкъэхэр фашIыгъэх.

Санитарнэ Iофтхьабзэхэр

Коронавирусым щыухъумэ­гъэнхэм фэшI Адыгеим иобщественнэ транспорт, кIэлэцIыкIу IыгъыпIэхэр, еджапIэхэр, щэпIэ чIыпIэхэр, бэдзэрхэр дезинфекцие ашIых.

Пэтхъу-Iутхъур, гриппыр къы­зэутэкIыгъэхэр «линие плъырым» теонхэ, зыгъэгумэкIыхэрэ упчIэхэм яджэуапхэр мы те­лефон номерхэмкIэ къызIэкIа­гъэхьанхэ алъэкIыщт: АР-м псауныгъэр къэухъумэгъэнымкIэ и Министерствэ — 8(8772) 53-49-97 (чэщ-зымафэм Iоф ешIэ), Роспотребнадзорым и ГъэIорышIапIэу Адыгеим щыIэм — 52-12-05 (IофшIэгъу уахътэм).

Iэшъынэ Сусан.