Пытагъэ хэлъэу къекIолIэщтых
Промышленнэ продукциер хэбзэнчъэу гъэзекIогъэным пэуцужьырэ республикэ комиссием зичэзыу зэхэсыгъоу иIагъэр зэрищагъ Адыгэ Республикэм и Премьер-министрэ игуадзэу Сапый Вячеслав.
Щынэгъончъэ ыкIи идэгъугъэкIэ шапхъэхэм адиштэрэ лыр цIыфхэм агъэфедэным, продукциеу къыращэрэр щынэгъончъэным фэшI Краснодар таможнем Iофэу зэшIуихыхэрэм, нэмыкI Iофыгъохэми зэхэсыгъом щытегущыIагъэх.
Роспотребнадзорым и ГъэIорышIапIэу Адыгеим щыIэм ипащэу Сергей Завгороднем къызэриIуагъэмкIэ, блэкIыгъэ илъэсым лыр зыгъэфедэрэ объект 770-мэ контрольнэ-надзорнэ Iофтхьабзэхэр ащашIыгъэх. Ахэм къызэрагъэлъэгъуагъэмкIэ, санитарнэ хэукъоныгъэ 1250-рэ агъэунэфыгъ, тазыр 320-рэ атыралъхьагъ. Продукциеу къыращэрэр щынэгъончъэным фэшI Краснодар таможнем Iофэу зэшIуихыхэрэм зэхэсыгъом щытегущыIагъэх. КъызэраIуагъэмкIэ, 2019-рэ илъэ- сым къыращэрэ гъомылапхъэхэм ящыкIэгъэ тхылъхэр зэрапымылъхэм къыхэкIэу Iофи 8 къызэIуахыгъ. Джащ фэдэу Таможеннэ союзым ыгъэуцугъэхэ шапхъэхэм адимыштэу гъогогъуи 6 агъэунэфыгъ. Санкциеу щыIэхэм къадыхэлъытагъэу продукциеу тикъэралыгъо къыращэнэу фитыныгъэ зэрямыIэхэмкIэ шапхъэр аукъуагъэу агъэунэфыгъ. Ащ епхыгъэу административнэ Iоф къызэIуахыгъ, зилажьэм тазыр тыралъхьагъ.
Республикэм щащэрэ продукциер шапхъэхэм адиштэн ыкIи щынэгъончъэу щытын зэрэфаер, ащ пытагъэ хэлъэу къекIолIэнхэ, хэбзэгъэуцугъэр зыукъохэрэм зэрифэшъуашэу адэзекIонхэ, яфэшъуашэр ягъэгъотыгъэныр пшъэрылъ шъхьаIэхэм зэращыщыр зэхэсыгъом хэлэжьагъэхэм къыхагъэщыгъ.
Гъонэжьыкъо Сэтэнай.