2020-рэ илъэсым имэзитIу къыкIоцI Адыгэ Рес­пуб­ликэм гъогу хъугъэ-шIэгъэ 64-рэ ща­гъэунэфыгъ. Ахэм нэбгыри 10 ахэкIодагъ, 78-мэ шъобжхэр атещагъэх. Анахь гумэкIыгъо къэ­зы­ты­хэрэ лъэны­къохэм ащыщых лъэсрыкIохэр зыхэфэхэрэ хъугъэ-шIагъэхэр.

Пчъагъэу къатыгъэхэм ащыщэу 22-м лъэсрыкIохэм атехьагъэх ыкIи ащ ыпкъ къикIыкIэ нэбгыри 6-мэ ядунай ахъожьыгъ, 15-мэ шъобжхэр хахыгъэх. Гъогу хъугъэ-шIэгъэ 16 лъэсрыкIо зэпырыкIыпIэхэм атехъу­хьагъ, нэбгыри 3 ащыхэкIодагъ, 14-мэ шъобжхэр хахыгъэх.

Урысыем хэгъэгу кIоцI Iоф­хэмкIэ и Министерствэ гъогурыкIоныр щынэгъончъэнымкIэ и ГъэIорышIэпIэ шъхьаIэ иунашъокIэ мы илъэсым гъэтхапэм и 16 — 22-м пэшIорыгъэшъ Iофтхьабзэхэу «Лъэс­рыкIу», «ЛъэсрыкIо зэпырыкIыпI» зыфиIохэрэр республикэм щыкIощтых. КIэлэцIыкIу гъогу-транспорт фыкъоныгъэхэр дэгъэзыжьыгъэнхэм, лъэсрыкIохэм ыкIи водительхэм шапхъэхэр амыукъохэу зекIонхэм, зыныбжь имыкъугъэхэм ящынэгъон­чъагъэ къэухъумэгъэным ахэр фэ­IорышIэщтых.

Iофтхьабзэр окIофэ къулыкъум иамалхэр анахьэу щынагъо къэзытыхэрэ чIыпIэхэм атырагощэщтых. ЛъэсрыкIохэр зыхэфэхэрэ хъу­гъэ-шIагъэхэм лъапсэ афэхъухэрэр къы­хагъэщыщтых. Сырынэр агъэфе­дэщт, «бэщ къолэнымкIэ» зекIоныр агъэIорышIэщт, полицейскэ автомобильхэм къэнэфырэ пкъыгъор ахэгъэнагъэу лъэсрыкIохэм адэгущы­Iэхэзэ зекIощтых.

ПIатIыкъо Ичрам. ОБДПС-м иротэу N 1-м икоман­дир, полицием иподполковник.