УФ-м и Президент 2019-рэ илъэсым итыгъэгъазэ и 23-м Адыгеим къызэкIом, общественностым илIыкIохэм зэIукIэгъу адыриIагъ. Джащыгъум ахэм предложениеу къахьыгъагъэхэм ащыщхэр игъоу ылъытагъэхэу, пшъэрылъ гъэнэфагъэхэр ышIыгъэх. Ахэр интернет нэкIубгъоу Кремлин.ру зыфиIорэм къихьагъэх. Анахьэу къуаджэм, мэкъумэщ хъызмэтым хэхъоныгъэхэр ягъэшIыгъэнхэр ары ахэр зыфэгъэхьыгъэхэр.

Шъугу къэдгъэкIыжьын, зэIукIэгъум къыщыгущыIэгъагъэ­хэм ащыщ муниципальнэ образованиехэм я Ассоциацие иправление итхьаматэу, Инэм псэупIэ кой администрацием ипащэу Хъоткъо Хъызыр. Къо­джэ псэупIэхэм хэхъоныгъэ ягъэшIыгъэным фытегъэпсыхьэгъэ программэм къыдыхэлъытагъэу псэуалъэхэр зэрашIыщтхэ проектхэм ягъэхьазырынкIэ субъектхэм IэпыIэгъоу къаратырэм нахь зегъэушъомбгъугъэ­нэу предложение ащ къыхьыгъагъ.

Къоджэ псэупIэхэм адэсхэм IэпыIэгъу афэхъурэ волонтерхэр Iофэу ашIэрэм нахь кIагъэгушIунхэ фаеу зэрилъытэрэр къыриIотыкIыгъагъ Адыгэ рес­публикэ организациеу «Ресурсный центр добровольчества «Волонтеры Адыгеи» зыфиIорэм ипащэу Ованес Шекерьянц. Мы лъэныкъом нахьыбэу анаIэ тырагъэтынэу предложение къыхьыгъагъ. Волонтерхэу къо­джэ псэупIэхэм адэсхэм Iэпы­Iэгъу язытыхэрэр Урысые зэнэкъокъоу «Доброволец России» зыфиIорэм хэгъэлэжьэгъэн­хэм хэплъэнхэу УФ-м и Президент ащ фэгъэзагъэхэм пшъэ­рылъ афигъэуцугъ.

— УФ-м и Президент общественностым илIыкIоу зыфэзыгъа­зэхэрэм япредложениехэм къызэрадыригъаштэрэм ишIуа­гъэкIэ къэралы­гъоми, тирес­пуб­лики ащ хэтэу, амалышIухэр яIэ хъугъэ, — къыIуагъ АР-м и ЛIышъхьэу КъумпIыл Мурат.