Хэгъэгу зэошхор заухыгъэр илъэс 75-рэ зэрэхъурэм фэшI УФ-м и Президент иунашъокIэ агъэнэфэгъэ ахъщэ тынхэр зытефэхэрэм зэкIэми мэлылъфэгъу мазэм аIэкIагъэхьащтых.

Къэралыгъом ипащэ иунашъо тетэу Хэгъэгу зэошхом хэлэжьагъэхэм ыкIи сэкъатныгъэ хэзы­хыгъэхэм, ветеранхэу «Жителю блокадного Ленинграда» зыфиIорэ бгъэхалъхьэр къызэратыгъэхэм, ыныбжь имыкъугъэу гъэрэу фашистхэм аубытыгъагъэхэм, Хэгъэгу зэошхом, финскэ ыкIи японскэ заохэм ахэ­кIо­дагъэхэм, нэужым дунаим ехыжьыгъэхэм яшъхьэгъусэу къэнагъэхэм нэбгырэ пэпчъ сомэ мин 75-рэ зэтыгъоу фа­тIупщыщт.

Хэгъэгу зэошхом илъэхъан тылым щыIагъэхэм ыкIи аныбжь икъугъэу гъэрэу фашистхэм аубытыгъагъэхэм нэбгырэ пэпчъ сомэ мин 50 фэкIощт. Джащ фэдэу УФ-м и Президент иунашъокIэ Хэгъэгу зэошхом хэлэ­жьагъэхэм ыкIи сэкъатныгъэ хэзыхыгъэхэм илъэс къэс ТекIо­ны­гъэм и Мафэ ипэгъокIэу афатIупщырэ сомэ мин пшIырыпшIыри мэлылъфэгъу мазэм аIэкIагъэ­хьащт.

Мы унашъохэм къахиубытэхэу Адыгеим нэбгырэ 2500-рэ ис. Фондым ичIыпIэ органхэм тхылъхэу аIэкIэлъхэм къапкъырыкIыхэзэ ахэм яспискэхэр агъэнафэх, тхылъхэр агъэхьазырых.