Компьютерым Iоф ришIэнэу еджэгъэ пенсионерхэм ар къэзыушы­хьатырэ тхылъхэр джырэблагъэ къаратыжьыгъэх.

Мы илъэсымкIэ ар апэрэ куп, нэбгырэ 12 зэрэхъущтыгъэхэр, Мыекъопэ къэралыгъо технологическэ университетым прикладной математикэмкIэ икафедрэ щырагъэджагъэх.

Программэр сыхьат 32-рэ зэрэхъущтыгъэр. Пенсионерхэм компьютерымкIэ текстхэр хаутынхэу, Интернетыр, социальнэ нэкIубгъохэр агъэфедэшъунхэу ыкIи къэралыгъо фэIо-фашIэхэр къызIэкIагъэхьанхэу арагъэ­шIагъ.

Еджэныр къэзыухыгъэхэм УФ-м ПенсиехэмкIэ ифонд и Къутамэу АР-м щыIэм ипащэу Къулэ Аскэрбыйрэ кафедрэм ипащэу Цундышк Вячеславрэ афэгушIуагъэх. Ныбжьым емы­лъытыгъэу, зэкIэми компьютерыр шIэгъошIу зэрафэхъугъэр ахэм къыхагъэщыгъ, чаныгъэ къызэ­рэзыхагъэфагъэм, джыри еджэнхэ фаеу зэрэхъурэм къы­зэримыгъэщтагъэхэм пае «тхьа­шъуегъэпсэу» араIуагъ.

ПенсиехэмкIэ фондым и Къу­тамэу АР-м щыIэм, Урысыем ипенсионерхэм я Союз ишъо­лъыр къутамэ, Адыгэ къэралыгъо ыкIи Мыекъопэ къэралыгъо технологическэ университетхэм, Адыгэкъалэ иегъэджэн Гупчэ зэзэгъыныгъэу блэкIыгъэ илъэ­сым зэдашIыгъэм къыхиубытэу пенсионерхэр компьютерыр агъэIорышIэшъуным фагъасэх. Лъэпкъ проектэу «Демография» зыфиIорэм ар къыдыхэлъытагъ.

Зэзэгъыныгъэр зашIыгъэм къыщыублагъэу нэбгырэ 600-мэ курсхэр къаухыгъэх. Мы илъэсым джыри нэбгырэ 500 компьютерым фагъэсэн гухэлъ яI. Ахэм ащыщэу 275-р МКъТУ-р ары зыщырагъэджэщтыр.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.