Шъолъыр гъогухэм ягъэцэкIэжьын лъагъэкIуатэ
Лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэр анахь дэгъоу зыгъэцэкIэрэ шъолъырхэм Адыгеир ащыщ.
Мыщ епхыгъэ Iофыгъохэр псынкIэу зэшIохыгъэнхэм, ащ фэгъэзэгъэ ведомствэхэм, къулыкъухэм япшъэрылъхэр зэрифэшъуашэу агъэцэкIэнхэм лъэплъэ Адыгэ Республикэм и ЛIышъхьэу КъумпIыл Мурат.
ЗэрагъэнэфагъэмкIэ, 2020-рэ илъэсым проектым игъэцэкIэн сомэ миллион 435,7-рэ республикэм щыпэIуагъэхьащт, миллион 331-р – федеральнэ гупчэм, миллиони 144,7-м ехъур – республикэ бюджетым къатIупщыщт.
Шъолъыр мэхьанэ зиIэ гъогухэм ягъэцэкIэжьынкIэ заказчикыр «Адыгеяавтодорыр» ары. Мы илъэсымкIэ пшъэрылъэу щытыр Адыгеим имуниципалитетхэм апхырыкIырэ шъолъыр мэхьанэ зиIэ гъогу километрэ 35,86-рэ зэтегъэпсыхьэгъэныр ары, ащ пае учреждением сомэ миллион 219,4-м ехъу фатIупщы. ЗэкIэмкIи псэолъэ 42-мэ гъэцэкIэжьынхэр ащыкIощтых: гъогу 32-м – шъолъыр, 10-м – чIыпIэ мэхьанэ яI. Гъогухэм ягъэцэкIэжьын фэгъэзэгъэщт организациехэр 2019-рэ илъэсым ыкIэм агъэнэфагъэх, зэзэгъыныгъэхэри адашIыгъэх.
ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «БАК–Строй» зыфиIорэм псыхъоу Шъхьэгуащэ ыкIыбкIэ щыIэ район цIыкIум гъэцэкIэжьын IофшIэнхэр щыригъэжьагъэх. Джащ фэдэу Мыекъуапэ иурамэу Шэуджэным ыцIэ зыхьырэм изы Iахь изэтегъэпсыхьан фежьагъ.
Яблоновскэ къэлэ псэупIэм игъогухэм ащыщхэм ягъэцэкIэжьын фэгъэзагъэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Мыекъопэ ДРСУ-р» ары. Ащи IофшIэнышхо ыгъэцэкIэнэу къыпыщылъ. Поселкэм иурамэу Пушкиным ыцIэ зыхьырэм игъэкIэжьын фирмэр фэгъэзагъ. Джащ фэдэу канализацие рыкIуапIэхэм ягъэтIылъын епхыгъэ IофшIэнхэри ригъэжьагъэх. Ащ сомэ миллион 66-м ехъу пэIуагъэхьанэу агъэнафэ, 2020-рэ илъэсым шышъхьэIум нэс пшъэрылъыр агъэцэкIэн гухэлъ щыI.
Кощхьэблэ, Мыекъопэ, Джэджэ, Шэуджэн, Красногвардейскэ, Теуцожь ыкIи Тэхъутэмыкъое районхэм апхырыкIырэ гъогухэм ащыщ Iахьхэм ятеплъэ нахьышIум ылъэныкъокIэ зэблэхъугъэ хъущт, бэдзэогъум ыгузэгум нэс мыхэр зэтырагъэпсыхьащтых.
Лъэпкъ проектым къыгъэнэфэрэ къэгъэлъэгъонхэм акIэхьэгъэным фэшI «Адыгеяавтодорым» технологическэ шIыкIакIэхэр къызфигъэфедэщтых, гъогухэм атыралъхьащт асфальт-бетон зэхэлъыр непэрэ шапхъэхэм адиштэщт. Джащ фэдэу гъэцэкIэжьынхэр зыщыкIощтхэ Мыекъуапэ игъогухэм ащыщхэм общественнэ транспортыр къызщыуцун ылъэкIыщт чIыпIэхэр ащагъэпсыщтых, гъогу тамыгъэхэр атырагъэуцощтых, нэмыкIэу ашIэщтыр бэ. IофшIэнхэр зэкIэ мы илъэсым гъэмафэм ыкIэм ехъулIэу аухынхэу ары.
ТХЬАРКЪОХЪО Адам.