Автомобильхэр Iуамыфынхэм фэшI шIэгъэн фаехэр

АпэрапшIэ автомобилыр къэ­зыгъэгъунэрэ сигнализациер ыкIи рулыр бгъэIорышIэн умы­лъэ­кIынэу механическэ пкъыгъор («секреткэ» раIо) ащ хэ­жъугъэуцох. Джащ фэдэу ахъщэу уиIэм елъытыгъэу автомобилым лъыплъэрэ спутник системэр хэбгъэуцомэ дэгъу. Гараж уимы­Iэмэ, чэщым автомобильхэр къызщагъэгъунэхэрэ уцупIэм дэжъугъэуцомэ на­хьышIу. Офис­хэм ыкIи банкхэм ачIэт камерэхэм шъуащыгугъы хъущтэп. Ахэм ахэт пкъыгъохэм чIэхьэпIэ закъор ары къагъэлъа­гъорэр.

Машинэм шъукъызикIыкIэ двигателыр хэгъэнагъэу къэшъу­мыгъан. Джащ фэдэу тучаным е зыгъэпсэфыпIэ чIыпIэм шъу­кIуагъэмэ, IункIыбзэр ыкIи автомобилым идокументхэр зыда­шъуштэх. Шъуимашинэ Iуафыгъэмэ, псынкIэу полицием ите­лефон номерэу 02-мкIэ шъутеу.

Ялотерее къыхьыгъэу араIозэ…

БзэджашIэр телефонымкIэ цIыфым фытео (е СМС шIыкIэмкIэ макъэ регъэIу) ыкIи осэ ин зиIэ шIухьафтын е лотерее къыхьыгъэу реIо. ШIухьафтыныр къэзыхьыгъэм ар ыштэжьыным пае ахъщэ ытын фаеу гъэпцIа­кIом ащ гурегъаIо (гущыIэм пае, ар IэкIэгъэхьажьыгъэным пае тефэщт ахъщэр е хэбзэIахьыр). АгъапцIэрэм ар ышIошъ мэхъу ыкIи къыраIогъэ счетым ахъщэ регъахьэ. Ащ ыуж зэкъодзакIом зегъэбылъыжьы.

Мыщ фэдэ Iоф шъухэмыфэным пае шъумышIэрэ горэ къы­шъуфытеомэ, къышъуиIорэр шъушIошъ шъумыгъэхъу ыкIи афэшъумыгъэцакI. ГъэпцIакIор къышъуфытеуагъэу шъуегуцафэмэ, шъудэмыгущыIэу телефоныр жъугъэкIосэжь ыкIи СМС-у къышъуфатхыгъэм джэ­уап ешъумытыжь.

БАД-хэм япхыгъэу

Илъэс пчъагъэ хъугъэу зэкъо­дзакIохэр а зы лъагъом тетхэу цIыфхэр агъапцIэх. Бзэджа­шIэхэр анахь «зыфэщагъэхэр» нэжъ-Iужъхэр ары.

ХэбзэухъумэкIо къулыкъум иIофышIэу ашIуигъэшIызэ гъэп­цIакIор зыныбжь хэкIотагъэм фытеошъ, гъомылапхъэм халъхьэрэ уц нэпцIыр къызщищэфыгъэ бзэджэшIэ купыр аубытыгъэу реIо ыкIи зэрар зэрэрахыгъэм фэшI компенсациер къыратыжьынэу гурегъаIо. Ащ пае хэбзэIахьэу ыкIи къэралыгъо пошлинэу ащ тефэщт ахъщэр ытын фаеу раIо. Мыщ фэдэ шIыкIэмкIэ нэжъ-Iужъхэр агъэделэх, яахъщэ ашIуатыгъу.

Фирмэ зэфэшъхьафхэм яIофышIэу къащагъэхъузэ гъэпцIа­кIохэм бзэджэшIагъэхэр зэра­хьэх. ШъумышIэрэ цIыфым зе­шъумыгъэгъэдел, шъудэмыгущыI.

Административнэ хэукъоныгъэ зышIыгъэхэм

Административнэ хэбзэгъэуцугъэм къызэрэдилъытэрэмкIэ, хабзэр зыукъуагъэм къытыралъхьэгъэ тазырыр мэфэ 60-м къыриубытэу ыпщыныжьын фае. Ежь-ежьырэу тазырыр а уахътэм зимытыжькIэ, хьыкум приставхэм шIокI имыIэу къырагъэ­пщыныжьыщт.

Ащ нэмыкIэу тазырыр игъом зэримыпщыныжьыгъэм фэшI фэдитIукIэ нахьыбэу административнэ тазырыр (сомэ ми­ным мынахь макIэу) арагъэты е чэщ-зымэфэ 15-кIэ административнэ хьапс тыралъхьэ, е сыхьат 15-кIэ шIокI имыIэу Iоф ышIэнэу агъэнафэ.

Шъугу къэтэгъэкIыжьы, 2016-рэ илъэсым щылэ мазэм и 1-м къыщыублагъэу административнэ хэбзэукъоныгъэхэмкIэ УФ-м и Кодекс зэхъокIыныгъэу фашIыгъэм къызэрэщиIорэмкIэ, административнэ тазырыр мэфэ 20-м къыкIоцI зыптыжькIэ, ащ ызыныкъо къыпфагъэгъу.

Административнэ хэбзэукъоныгъэхэмкIэ УФ-м и Кодекс истатьяу 20.25-м ыкIи тазырхэм шапхъэу апылъхэм защыжъугъэ­гъозэнхэ шъулъэкIыщт АР-м хэгъэгу кIоцI IофхэмкIэ и Министерствэ исайт.

ЦIыфхэр бэу зыхэлэжьэхэрэ Iофтхьабзэхэм уазэращызекIон фаер:

— общественнэ рэхьатны­гъэр уукъо хъущтэп;

— цIыфхэмкIэ щынагъоу ыкIи гузэжъогъоу щыт зекIуакIэхэр щыбгъэзыенхэ фае;

— Iофтхьабзэхэр зыщыкIо­хэрэ псэуалъэхэм ыкIи агъэфедэхэрэ пкъыгъохэм уафэса­къын фае;

— цIыфхэм ыкIи ахэм яфэIо-фашIэхэр зыгъэцакIэхэрэм, Iофтхьабзэм изэхэщакIохэм, пэщэ IэнатIэм Iутхэм, Iофтхьабзэм изэхэщэнкIэ общественнэ рэхьатныгъэр къэзыухъумэхэрэм шъхьэкIафэ афэшъушIын фае;

— Iофтхьабзэр зыщырекIо­кIырэ уахътэм машIор къэмыгъэхъугъэнымкIэ ыкIи рэхьатныгъэр къэухъумэгъэнымкIэ хэбзэухъумэкIо къулыкъухэм къышъуаIорэр хабзэм тетэу жъугъэцэкIэнэу щыт;

— зыныбжь имыкъугъэхэм алъыплъэн щымыIэу язакъоу къэшъумыгъанэх;

— хэушъхьафыкIыгъэ хэхыгъэ чIыпIэхэм шъуиавтомобильхэр жъугъэуцух;

— ошIэ-дэмышIэ Iоф къэ­хъоу цIыфхэр агъэкощынхэ фаеу хъумэ, хэгъэгу кIоцI къулыкъум иIофышIэ ыIорэм тетэу шъузе­кIонэу щыт, рэхьатныгъэ зы­хэжъугъэлъ, егъэлыегъащэу щы­нэныгъэ къызхэжъугъафэ хъущтэп.

Адыгэ Республикэм ичIыпIэхэм цIыфхэр бэу зыхэлэжьэхэрэ Iофтхьабзэхэр ащырекIокIыхэ хъумэ общественнэ рэхьатныгъэр къэухъумэгъэнымкIэ хэбзэукъоныгъэ зэрахьа­гъэу хъугъэ-шIагъэхэм шъуарихьылIагъэмэ, АР-м хэгъэгу кIоцI Iоф­хэмкIэ и Министерствэ идежурнэ часть иномерэу (8772) 59-64-00-мкIэ е 02-мкIэ макъэ яжъугъэIун шъулъэкIыщт.