Кавказ заповедникыр шIу зылъэгъухэу, ащ ичIыпIэ зэфэшъхьафхэр зэзыгъэлъэгъу зышIоигъохэм гъэтхапэм и 5-м къыщегъэжьагъэу зы мазэрэ агъэ­федэшъущт абонементхэр къащэфынхэ алъэкIыщт. Ащ фэдэ тхылъ зэзыгъэгъотыхэрэм зэрэфаехэм фэдизрэ заповедникым ичIыпIэ дахэхэмрэ ичIыопс саугъэтхэмрэ зэрагъэлъэгъунхэу фитыныгъэ яIэщт.

Кавказ биосфернэ заповедникым идиректор экологие гъэсэныгъэмрэ зекIонымрэкIэ игуадзэу Ольга Пеговам къызэриIуагъэмкIэ, абонементхэр зэтефыгъэх. ГущыIэм пае, хэшъэе мэзжъыер, «Южные куль­туры» зыцIэ паркыр ыкIи псэушъхьэхэр зыщаIыгъхэ эко-гупчэу «Лаура» зыфиIорэм яплъыщтхэм билетым сомэ 2500-рэ лъатыщт. Ахэм ащыщэу зы къыхэпхымэ, сомэ 1500-рэ.

Краснэ полянэм щыIэ объектхэм ащыщэу зы нахь плъэгъунэу уфэмыемэ, сомэ 750-кIэ къэпщэфырэ абонементымкIэ заповедникым мазэрэ къыщыпкIухьан уфит. Илъэс псаум бгъэфедэшъущт абонементхэри щыIэх, ахэм сомэ 3000 ауасэр.

ЦIыфым ыцIэ зытетхэгъэ абонементхэри фаехэм къащэфынхэ алъэкIыщт. Ахэм заповедникым ичIыгу­хэр зыщыфаехэм къаплъыхьанхэ фитых пIалъэу абонементым итхагъэр къэсыфэ. Ащ фэдэ абонементыр зыгъэфедэнэу щытыр ар къэзыщэфыгъэ закъор ары.

Джащ фэдэу объект гъэшIэгъонхэр, зекIо ыкIи экскурсионнэ маршрутхэр зикIасэхэр заповедникым хагъэхьанхэм пае ахъщэу атыщтыр тыдэкIи щызэфэдэ ашIыгъ. Зыныбжь икъугъэхэм — сомэ 300, кIэлэцIыкIухэу илъэси 7 — 14 зыныбжьхэм соми 150-рэ, илъэси 7 мыхъугъэхэмрэ хабзэм фитыныгъэ къызфишIыхэрэмрэ ахъщэ арагъэтыщтэп.

(Тикорр.).