«ОНФ-м иныбжьыкIэхэр» зыфиIорэ купым маршруткэхэм яIофшIэн епхыгъэ уплъэ­кIун­хэр ригъэкIокIыгъ. Урысыем ишъолъыр 76-мэ рейдхэр ащыкIуагъэх.

Къэлэ кIоцIым цIыфхэр къыщезыщэкIырэ транспортым имы­закъоу, къалэм дэкIыхэрэр зэрэIэрыфэгъухэр общественникхэм ауплъэкIугъ.

УплъэкIунхэм къызэрагъэ­лъэгъуагъэмкIэ, шъолъырхэр «нэфрыгъозэ шIыкIэм» фэдэу къэнэфыгъэх. «Плъыжь лъэныкъом» хэфэгъэ субъектхэр зиобщественнэ транспорт иIоф­шIакIэ уасэу «3»-м нахь макIэ зыфагъэуцугъэхэр ары, ащ фэдэ шъолъырхэр 25-рэ мэхъу. «Гъожь лъэныкъом» дэгъухэр хэхьагъэх, ахэр шъолъыр 51-рэ. Дэгъу дэдэу алъытагъэр шъо­лъыри 3, ахэр «уцышъом» хэфагъэх. Адыгеим щыпсэухэрэм анахь баллыбэ къатыгъ: 4,4-рэ.

«ОНФ-м иныбжьыкIэхэм» ясайт къызэрэщатхыгъэмкIэ, уплъэкIунхэр IахьитIоу гощы­гъагъэх: общественнэ транспортым иIофшIакIэ уплъэкIугъэныр; цIыфхэм яеплъыкIэ къэуцупIэхэм ыкIи социальнэ хъытыухэм защыщыгъэгъозэгъэныр.

Общественнэ транспортыр зыгъэфедэрэ нэбгырэ мини 5-мэ яеплъыкIэкIэ зэфэхьысыжьхэр ашIыгъэх. Анахьыбэу балли 5 афагъэуцунэу щыты­гъэр. Урысыем ишъолъырхэм ащыщ зыми балли 4,5-м на­хьыбэ къыхьыгъэп. Анахь кIэух дэгъу къэзыгъэлъэгъуагъэр Адыгеир ары — 4,4-рэ, Мордовием ыкIи Сахалин хэкум — 4.

Зэфэхьысыжьхэр къэралыгъо хэбзэ къулыкъухэм алъа­гъэIэсыгъэх.

«УплъэкIунхэм пшъэрылъ шъхьаIэу яIагъэр — Iофыгъоу щыIэхэр къыхэгъэщыгъэнхэр ыкIи ахэм ядэгъэзыжьынкIэ унашъохэр штэгъэнхэр. Предложениехэр дгъэхьазы­рыгъэх. ГущыIэм пае, къэуцу­пIэхэм язытет мытэрэзэу е ахэр щымыIахэхэу цIыфхэм къаIомэ, общественнэ транспортыр къыз­щыуцущтыр зы шапхъэм тетэу шIыгъэнхэр. ЗэрэзекIохэрэм ыпкIэ зэратыщт системэм (карточкэкIэ атыным) фэгъэхьыгъэ хэбзэгъэуцугъэ щыI нахь мышIэми, автобусхэр зиIэ пстэуми ар агъэцакIэрэп. Iофыгъор зэшIо­хыгъэ хъуным къыхэлэжьэнхэу охътэ кIэкIым къыкIоцI тхыгъэ­хэр шъолъырхэм япащэхэм афэдгъахьыщтых», — «ОНФ-м иныбжьыкIэхэр» зыфиIорэ купым ипащэу Игорь Кастюкевич пресс-зэIукIэм къыщиIуагъ.

Сурэтхэр Iэшъынэ Аслъан тырихыгъэх.