«Адыгэ макъэм» иредакцие Мыекъуапэ щы­псэурэ пенсионерэу СтIашъу Аслъан зы­къы­фигъэзагъ. Теуцожь районым ит къуа­джэу Пэнэжьыкъуае саугъэт цIыкIоу къыща­­гъотыгъэр хабзэм диштэу тхыгъэным фэшI амалэу щыIэхэр ащ рихьылIагъэхэу ыуж ит. Iофым епхыгъэ къулыкъу пстэуми тигъэзет инэкIубгъохэмкIэ ащ зафегъазэ ар нахь псын­кIэу зэшIохыгъэ хъуным фэшI.

Хэгъэгу зэошхом илъэхъан Пэнэжьыкъуае шъхьафит ашIы­жьызэ къоджэдэс партизанхэу аукIыгъэхэм мы саугъэтыр афагъэуцугъагъ. Мыщ тетхэгъэ лъэкъуацIэхэм ежь Аслъан яти ахэт: СтIашъу Шъалихь Амзанэ ыкъу (1905-рэ), Iэшъынэ Ахьир ЦIыкIуныбэ ыкъу (1922-рэ), Хьанэхъокъо Гъусэрыкъу Лыхъо ыкъу (1905-рэ), Цундышк Хьис Ибрахьимэ ыкъу (1878-рэ), БатIыжъ Ахьир Былау ыкъу (1881-рэ), Тыгъужъ Саусэрыкъу Нащэ ыкъу (1910-рэ).

— Сэ сызыфаер мы саугъэт цIыкIур зыфагъэуцугъэ партизанхэм лIыхъужъныгъэу зэра­хьагъэм шъхьащэ фашIыныр, яшIэжь мыкIодыныр ыкIи зэрифэшъуашэу адрэ саугъэтхэм зэрапылъхэм фэдэу анаIэ тырагъэтынэу ары, — къыIуагъ СтIашъу Аслъан. — Мыр зэрэщыIэр зышIэрэ къоджэдэсхэу ар зыгъэкъабзэхэрэм «тхьа­шъуегъэпсэу» ясэIо. Арэущтэу щыт нахь мышIэми, хабзэм диштэу саугъэтыр тхыгъэ зыхъу­кIэ, игъэкIотыгъэ гъэцэкIэжьынхэр рашIылIэщтыгъэх ыкIи гъэ къэс саугъэтхэр къакIухьэхэзэ къэгъагъэхэр зэратыралъхьэрэм фэдэу мыри къагъэнэщтэп. Зыфагъэуцугъэ партизанхэм яIахьылхэм зашIэкIи къекIо­лIэщтых.

ТигущыIэгъу къызэриIуагъэмкIэ, Теуцожь район админист­рацием ипащэу Хьачмамыкъо Азэмат ащ зыфигъэзагъ, Iофым изытет гуригъэIуагъ. Саугъэтыр Росреестрэм хатхэнымкIэ ащ фэлъэкIыщтыр зэришIэщтымкIэ къыгъэгугъагъ. Мы уахътэм тхылъхэр район администрацием егъэхьазырых. Нэужым ахэр АР-м икультурнэ кIэн къэухъу­мэгъэнымкIэ ыкIи гъэфедэгъэнымкIэ ГъэIорышIапIэм агъэ­хьыщтых.