Хэгъэгум иухъумакIо и Мафэ фэгъэхьыгъэ зэIукIэгъухэр Мыекъуапэ щызэхащагъэх.

Къалэм культурэмкIэ и Унэу «Гигантым» мэфэкI концертэу щыкIуагъэм ащ иансамблэхэр, «Иван ыкIи Мария» зыфиIорэр, «Шпаргалкэр», «Майкопчанкэр», къалэм искусствэхэмкIэ икIэлэцIыкIу еджапIэу N 1-р хэлэжьагъэх.

ЛIыхъужъныгъэм, зэкъошныгъэм, мамыр псэукIэм игъэпытэн яхьылIэгъэ орэдхэр зэхахьэм къыщаIуагъэх, къашъо­хэр къагъэлъэгъуагъэх.

— МэфэкIыр игъэкIотыгъэу хэдгъэунэфыкIыгъ, — къытиIуагъ Мыекъуапэ иадминистрацие культурэмкIэ и ГъэIорышIапIэ ипащэу Цэй Розэ. — ШIэжь яIэу ныбжьыкIэхэр пIугъэнхэмкIэ тапэкIи зэIукIэгъухэр зэхэтщэщтых.

Художественнэ фильмэу «Офицерхэр» Iофтхьабзэм хэлэжьагъэхэм къафагъэлъэгъуагъ. Фильмэм роль шъхьаIэр къыщызышIыгъэу, СССР-м инароднэ артистэу Василий Лановоир, илъэс заулэкIэ узэкIэIэбэжьмэ, Мыекъуапэ къы­зэкIом, филармонием тыщызэIукIи, зэдэгущыIэгъу гъэшIэгъонэу зэдытиIа­гъэр шIукIэ тыгу къэдгъэкIыжьыгъ.

Орэд къыIощтми, усэм къеджэщтми Василий Лановоим зэфэхьысыжьхэр ышIыхэзэ, псэ зыпыт гущыIэхэмкIэ цIыфхэм алъыIэсы зэрэшIоигъом тыщигъэгъозэгъагъ. Революционнэ, лIыхъужъ ыкIи лэжьэкIо щытхъум яхьылIагъэхэ рольхэу къышIыгъэхэр пшIы пчъагъэкIэ къалъытэх.

— ЩысэшIу зытыраххэрэ цIыфхэм ныбжьыкIэхэр тапэкIи аIудгъэкIэщтых, фильмэхэр къафэдгъэлъэгъощтых, концертхэр зэхэтщэщтых, — къытиIуагъ Цэй Розэ.