Адыгэ Республикэм и Лъэпкъ музей къыщызэIуахыгъэ къэгъэлъэгъоныр хьацIэ-пIацIэхэм яхьылIагъ.

Урысыем и Тхылъ Плъыжь датхагъэхэ хьацIэ-пIацIэхэу республикэм къыщаугъоигъэхэр 120-рэ фэдиз мэхъух. ПкIаухэр, хьампIырашъохэр, шъомпIэжъхэр, нэмыкIхэри. Лъэпкъ музеим ахэр къыщагъэлъагъох.

ХьампIырашъохэр гъатхэм зэрэбыбыхэрэр, Кавказ шъолъырым чIыпIэу къыщыхахырэр, фэшъхьафхэри музеим къакIохэрэм ашIогъэшIэгъоных. Гъатхэм къыщыублагъэу бжыхьэм нэс хьампIырашъохэр зэрэбыбыхэрэр, хьацIэ-пIацIэхэм афэгъэхьыгъэхэр Х. Г. Ша­пошниковым зэфихьысыжьыгъэх. Ащ иуплъэкIунхэр тыкъэзыуцухьэрэ дунаим епхыгъэх.

ШъомпIэжъхэр ятеплъэкIэ зэфэшъхьафых. «ШъомпIэжъ-шъыхь» зыфиIорэр Европэм щашIэ, анахь инэу алъыти, Урысыем и Тхылъ Плъыжь датхагъ.

Адыгэ Республикэм и Лъэпкъ музей ипащэу Джыгунэ Фатимэрэ ащ игуадзэу Шэуджэн Налмэсрэ къэ­гъэлъэгъоным икъызэIухын хэлэжьагъэх. Тыкъэзыуцухьэрэ дунаим кIэлэцIыкIухэр, ныбжьыкIэхэр нахьышIоу щыгъэгъозэгъэнхэмкIэ Лъэпкъ музеим нэмыкI зэхахьэхэр, къэгъэлъэгъонхэр зэрэщызэхащэщтхэр къаIуагъ.

Музеим хьацIэ-пIацIэхэр дахэу къыщагъэлъагъох. ПкIаухэм, хьампIырашъохэм, фэшъхьафхэм яплъы зышIоигъохэр зэхэщакIохэм рагъэблагъэх.

ЕмтIылъ Нурбый.