ТидзэкIолIхэм Хэгъэгу зэошхом ТекIоныгъэр къызыщыдахыгъэр илъэс 75-рэ зэрэхъурэм фэгъэхьыгъэ зэнэкъокъоу дзюдомкIэ Мыекъуапэ щыкIуагъэм спортым иветеранхэр хэлэжьагъэх.

Къэбэртэе-Бэлъкъарым, Къэрэ­щэе-Щэрджэсым, Темыр Осе­ти­ем — Аланием, Ингушетием, Крас­нодар краим, Астрахань ыкIи Воронеж хэкухэм, Адыгэ Рес­публикэм ябэнакIохэр Адыгэ къэралыгъо университетым физкультурэмрэ дзюдомрэкIэ и Институт щызэIукIагъэх.

Ныбжьыр тIэкIу хэкIотагъэми, ятеплъэкIэ ищыгъэх, спортым зэрэпылъхэр къа­хэщы.

Илъэс 60-м къехъугъэхэри нахь ныбжьыкIаIохэу къэ­лъагъох. Спортсменхэм янахьыбэр зэнэ­Iуас, дзюдом ныбджэгъу зэфишIыгъэхэу зэлъыкIохэрэр ахэтых.

Олимпиадэ джэгунхэм джэрзыр къащыдэзыхыгъэ Емыж Арамбый, СССР-м дышъэр, нэмыкI медальхэр къыщызыхьыгъэхэ Беданыкъо Рэмэзан, КIуае Хьазрэт, общественнэ IофышIэхэу Къуекъо Асфар, ЛIымыщэкъо Рэмэзан, Хъот Юныс, нэмыкI­хэри зэхахьэм гущыIэгъу щызэфэхъугъэх, якIэлэгъум спортым фыщытыкIэу фыряIагъэр агу къагъэкIыжьызэ, хъугъэ-шIэгъэ гъэшIэгъонхэр къаIуатэх.

Республикэм дзюдомкIэ испорт еджапIэу Кобл Якъубэ ыцIэ зы­хьырэм ипащэу, Адыгэ Респуб­ликэм изаслуженнэ тренерэу Бастэ Сэлымэ зэнэкъокъум лIэ­уж зэфэшъхьафхэр зэрэзэфищагъэхэр тизэдэгущыIэгъу къыщыхигъэщыгъ.

Аныбжьхэмрэ яонтэгъугъэрэ ялъытыгъэу апэрэ чIыпIэхэр къы­дэзыхыгъэхэр: Шыбзыхъо Рус­лъан, Анатолий Юровский, Къуе­къо Аслъан, кг 65-рэ. Хьагъур Аслъан, Абдул Болтиев, кг 71-рэ, Гасан Шагбазов, Майсигоев Иб­рахьим, Болэкъо Налбый, кг 78-рэ, Къэлэшъэо Андзаур, Бгъуа­шэ Зураб, Олег Козлятинов, кг 86-рэ, Джони Липаридзе, Джумбер Липаридзе, кг 95-рэ. Денис Соловьев, Урыс Олег, кг 95-м къехъух.

Медаль зэфэшъхьафхэр къыдэ­зыхыгъэхэр: А. Атонян, А. Еврумян, Къ. Къуижъ, К. Мэкъуао, Э. Кодзоев, М. Кощэкъу, М. Шэу­джэн, А. Жанэ, нэмыкIхэри.

— Шыбзыхъо Руслъан, Хьа­гъур Аслъан, Къэлэшъэо Андзаур, Бгъуашэ Зураб, фэшъхьафхэм алырэгъум бэнэкIэ гъэшIэгъон къыщагъэлъэгъуагъ, — къы­тиIуагъ зэхэщэкIо купым хэтэу, Урысыем, Адыгеим язаслуженнэ тренерэу Хъот Юныс. — Зэнэкъо­къум исудьяхэу Хьашхъуаныкъо Айвар, ШъэоцIыкIу Рустам зэхэщакIохэм афэразэх, IэпыIэгъу щыкIагъэхэп.

ФизкультурэмкIэ ыкIи дзю­домкIэ Институтым ипащэу Бгъуа­шэ Айдэмыр тизэдэгущыIэгъу къыщыхигъэщыгъ зэнэкъокъум зэфищэгъэхэ бэнакIохэм, спортым пылъхэм гукъэкIыжь дэгъу-хэр яIэхэу ядэжьхэм зэрагъэзэжьырэр. ЦIыфхэм япсауныгъэ игъэпытэнкIэ ащ фэдэ зэхахьэхэм ямэхьанэ зыкъеIэты.

Республикэм физкультурэмкIэ ыкIи спортымкIэ и Комитет итхьа­матэу Дэгужъые Мурат, ащ игуа­дзэу Андрей Бородиныр зэхахьэм хэлэжьагъэх, спортым пылъ­хэм гущыIэгъу афэхъугъэх. Комитетыр зэнэкъокъум изэхэщэн кIэщакIо фэхъугъ. «Хэгъэгу зэо­шхом итарихъ, тятэхэм, тятэжъхэм пыйхэм язэхэкъутэнкIэ лIы­хъужъныгъэу зэрахьагъэр, заом ыкIыб щыIэхэу Iоф зышIагъэхэм ТекIоныгъэм и Мафэ къызэра­гъэблэгъагъэр нахьышIоу цIыфхэм ашIэнымкIэ ащ фэдэ спорт зэIукIэгъухэр тищыкIагъэх», — къытиIуагъ республикэ общественнэ движениеу «Адыгэ Хасэм» итхьаматэу, спортымкIэ мастерэу ЛIымыщэкъо Рэмэзан.

ХагъэунэфыкIхэрэ чIыпIэхэр къыдэзыхыгъэхэм кубокхэр, медальхэр, щытхъу тхылъхэр, нэмыкIхэр аратыжьыгъэх. Сурэтхэр зэнэкъокъум къы­щытетхыгъэх.