Хэгъэгум иухъумакIо и Мафэ фэгъэхьыгъэ мэфэкI зэхахьэу АР-м и Къэралыгъо фи­лар­моние щыкIуагъэм хэлэжьагъэх Адыгэ Республикэм и ЛIышъхьэу КъумпIыл Мурат, Къэралыгъо Советым — Хасэм и Тхьаматэу Владимир Нарожнэр, министрэхэм я Каби­нет хэтхэр, депутатхэр, хэбзэухъумэкIо, фе­деральнэ ыкIи республикэ къулыкъухэм ялIыкIохэр, нэмыкIхэри.

КъумпIыл Мурат Хэгъэгу зэошхом иветеранхэм, тылым Iоф щызышIагъэхэм, УIэшыгъэ КIуачIэхэм, тинахьыжъхэм, мы мэфэкIыр хэзыгъэунэфыкIырэ пстэуми игуапэу къафэгушIуагъ. Мэзаем и 23-р тикъэралыгъо щыпсэурэ нэбгырэ пэпчъ имэфэкI шъыпкъэу зэрэщытыр, мы мафэм тидзэкIолIхэр зэкIэ зэ­рэзэрипхыхэрэр къыхигъэщыгъ. Хэгъэгу зэошхом ТекIоныгъэ къызщыдэтхыгъэр илъэс 75-рэ зэрэхъурэм епхыгъэу 2020-рэ илъэсыр шIэжьым ыкIи дзэ щытхъум я Илъэсэу зэрагъэнэфагъэр республикэм ипащэ игущыIэ къыщыхигъэщыгъ.

— НыбжьыкIэхэм яхэгъэгу шIу алъэгъоу къэтэджынхэм, къэралыгъом икъэухъумэн мэхьанэу иIэр зэхашIэным аужырэ илъэсхэм анахьэу тынаIэ тетэгъэты. Общественнэ, волонтер IофшIэнхэм ахэтхэм, юнармейцэхэм япчъагъэ хэхъо, — къыIуагъ КъумпIыл Мурат. — Адыгеим щыпсэурэ ныбжьыкIэ­хэм яреспубликэ ихъухьэрэм зэрэлъыплъэхэрэм мэхьанэшхо иI. Ащ фэдэу патриотизмэм фэгъэсагъэхэу къэтэджынхэм зиIахьышIу хэзылъхьагъэхэр дзэ ветеран организациехэр ары. Тарихъ шIэжьыр къытфэзы­гъа­нэхэу, Адыгеим мамырныгъэрэ зыпкъитыныгъэрэ илъыным фэлажьэхэрэм сызэрафэразэр сигущыIэ къыщыхэзгъэщы сшIоигъу.

Непэ Урысыем и УIэшыгъэ КIуачIэхэм гъэхъагъэу ашIы­хэрэм Адыгеим идзэкIолIхэми яIахьышIу зэрэхэлъыр Къум­пIыл Мурат къыIуагъ.

Зэхахьэм къыщыгущыIагъэх ыкIи мэфэкIыр хэзыгъэу­нэфыкIыхэрэм къафэгушIуагъэх АР-м и Парламент и Тхьаматэу Владимир Нарожнэмрэ АР-м иветеранхэм я Совет ипащэу Къуаджэ Аслъанрэ.

Республикэм итворческэ куп­хэм, орэдыIохэм къагъэхьазырыгъэ мэфэкI концертымкIэ Iофтхьабзэр зэфашIыжьыгъ.

Гъонэжьыкъо Сэтэнай.