2019-рэ илъэсым лъэсрыкIохэр зыхэфэгъэхэ хъугъэ-шIэгъи 128-рэ республикэм щагъэунэфыгъ. Ахэм нэбгырэ 23-рэ ахэкIодагъ, 115-мэ шъобж зэфэшъхьафхэр атещагъэхэ хъугъэ. Хъугъэ-шIагъэхэм янахьыбэр зыщагъэунэфыгъэр къалэу Мыекъуапэрэ Тэхъутэмыкъое районымрэ.

ХэбзэухъумакIохэм анахьэу къыхагъэ­щырэр лъэсрыкIо зэпырыкIыпIэхэм къащыхъухэрэр ары. БлэкIыгъэ илъэсым мыщ фэдэ хъугъэ-шIэгъэ 60 шъолъырым щагъэунэфыгъ, ахэм нэбгырэ 16 ахэкIодагъ, 58-мэ шъобжхэр атещагъэхэ хъугъэ. 2020-рэ илъэсым мыщ фэдэ аварии 2 агъэунэфыгъ, тIури Мыекъуапэ щы­хъугъэх.

Ежь лъэсрыкIохэми апкъ къикIыкIэ авариехэр бэрэ мэхъух. 2019-рэ илъэсым джащ фэдэ хъугъэ-шIэгъэ 62-рэ агъэунэфыгъ, ахэм нэбгырэ 17 ахэкIодагъ.

Водительхэм ямызакъоу, лъэсрыкIохэми сакъыныгъэ къызхагъэфэн, гъогурыкIоным ишапхъэхэр агъэцэкIэнхэ зэрэфаер хэбзэухъумакIохэм джыри зэ агу къагъэкIыжьы. Гъогум тызэрэщызекIо­рэм, шапхъэхэр зэрэдгъэцакIэхэрэм ялъытыгъ типсауныгъэрэ тищыIэныгъэрэ ухъумагъэхэ зэрэхъущтхэр.

Адыгеим хэгъэгу кIоцI IофхэмкIэ и Министерствэ ипресс-къулыкъу.