ИкIыгъэ зыгъэпсэфыгъо мафэхэр республи­кэм икъэлэ шъхьаIэрэ Мыекъопэ районымрэ ащыпсэухэрэмкIэ гумэкIыгъуагъэх — мы­хэм псыр къязыщэлIэрэ рыкIопIэшхор зэщы­къуагъ, чэщ-зымафэм зэпымыоу, чэщыми гъэ­псэфыгъо ямыIэу хъызмэтшIапIэу «Май­коп­водоканалым» иIофышIэхэр ащ игъэцэ­кIэ­жьын пылъыгъэх.

Щылэ мазэм и 18-м псэупIэу Нижегородскэм иIэгъо-благъохэр ары псырыкIуапIэр зыщызэпычыгъэр. Ар зэрэзэщыкIукIыгъэми, къушъхьалъэу зэрэщытыми Iофхэр къагъэхьылъагъэх, зэрэзэпагъэжъэжьыщтым къиныгъохэр къыпыкIыгъэх, ау лъэкIэу яIэ пстэури рахьылIи, щылэ мазэм и 19-м щэджэгъо­ужым IофшIэнхэр къаухыгъэх.Псыр убытыпIэхэм арагъэлъэ­дэфэкIэ сыхьат зытфых тешIагъ ыкIи блыпэм ар къэлэдэсхэм аIэкIагъэхьажьыгъ.

АпэрапшIэу…

Мы хъугъэ-шIагъэр джыри къэмыхъузэ Мыекъуапэрэ Мые­къопэ районымрэ ащыпсэухэрэм псыр нахь макIэу аIэкIахьэу хъугъэ. Тигъэзети къызэ­рэхиутыгъагъэу, ар къызы­хэкIыгъэр республикэм икъу­шъхьалъэхэм макIэу къызэращесыгъэр ыкIи бэшIагъэу ощхи зэращымыIагъэр ары. Мыекъопэ псырыкIуапIэм псы къыIэкIэзыгъэхьэрэ къэкIопIэ шъхьаIэхэм арытым ащ къыхэкIыкIэ къыщыкIагъ. Джащ пае шэпхъэ гъэ­­нэфагъэхэм атетэу псыр къатызэ ашIынэу рахъухьагъ ыкIи мафэ къэс пчэдыжьым сы­хьатыр 6-м къыщыублагъэу 9-м нэс ыкIи пчыхьэрэ сыхьатыр 7-м къыщегъэжьагъэу 10-м нэс икъоу ар къатIупщынэу унашъо ашIыгъагъ. НэмыкI уахътэхэм нахь макIэу къатынэу щытыгъ. Гавердовскэ артезиан псыубытыпIэм епхыгъэхэ Черемушкэм, къут. Гавердовскэм, поселкэу Западнэм, псэупIэу Ханскэм, къут. Веселэм адэсхэм псыр икъоу аIэкIахьэщтыгъ. Зигугъу къэтшIыгъэ ушъхьагъухэм апкъ къикIэу Мыекъопэ админист­рацием цIыфхэм зафигъэзагъ псыр илыягъэу амыугъоинэу. Ау псырыкIопIэшхор зэгочыщтми хэт ышIэныя?

ГъэцэкIэжьынхэр зэшIуахыфэ

ОшIэ-дэмышIэу псыр къызэрэуцупагъэм ыкIи ар аубытынэу зэрэмыхъугъэм апкъ къи­кIэу цIыфхэр къэгумэкIыгъэх. Интернет нэкIубгъохэм агу илъ пстэури къащыраIотыкIэу аублагъ, ау бэмэ къашIошIырэр шъыпкъэм пэчыжьагъ.

Iофхэм язытет Адыгеим и ЛIышъхьэу КъумпIыл Мурат ынаIэ тет зэпытыгъ. Сыхьат пэпчъ къэбарыр IэкIагъахьэ­щтыгъ. Хъугъэ-шIагъэм идэгъэзыжьынкIэ штаб зэхащагъ, ащ ипэщагъ вице-премьерэу Сапый Вячеслав.

ГъэцэкIэжьынхэр аухыфэкIэ цIыфхэм псыр ягъэгъотыгъэным тегъэпсыхьэгъэ фэIо-фашIэхэр Мыекъуапэ щызэхащагъэх, зэ­кIэлъыкIокIэ гъэнэфагъэм тетэу ар къалэм ирайон зэфэшъхьаф­хэм аIуащагъ. Уахътэу зафащэщтыр къэлэ администрацием, къэбарлъыгъэIэс амалхэм яинтернет нэкIубгъохэм арытыгъ.ПсырыкIуапIэр загъэцэкIэжьыгъэр щылэ мазэм и 19-м пчы­хьэм сыхьатыр 5-р ары. КъыкIэлъыкIорэ мафэм, щылэ ма­зэм и 20-м, пчэдыжьым цIыфхэм псы яIагъ.

ЦIыфхэр мыгуIэжьынхэу

Блыпэ пчэдыжьым псыр къа­тыжьыгъэми, Мыекъуапэ ыкIи Мыекъопэ районым арыт еджапIэхэмрэ кIэлэцIыкIу IыгъыпIэ­хэмрэ Iоф амышIэным тегъэ­псыхьэгъэ унашъо КъумпIыл Мурат къышIыгъ. Сабыйхэр къызфагъэнэн зимыIэхэр Iофы­шIэ къыдэмыкIыхэмэ, къафы­деплъынхэу ар IофшIэпIэ пащэ­хэм къяджагъ. Къыхэгъэ­щыгъэн фае, Адыгеим и ЛIышъхьэ иинтернет нэкIубгъокIэ цIыфхэм зыфагъазэщтыгъ ыкIи джэуапынчъэу ащ къыгъэнагъэхэп.

Къатыжьыгъ, ау…

Псыр къызэратыжьыгъэм емылъытыгъэу, ом изытет зэ­хъокIыныгъэ фэхъугъэп. Арышъ, ыпэкIэ къэттыгъэгъэ зэкIэ­лъы­кIуакIэм тетэу, псыр загъэма­кIэм зэрэщытыгъэм фэдэу джы­ри ар цIыфхэм аIэкIагъэхьащт: пчэдыжьым сыхьатыр 6-м къыщыублагъэу 9-м нэс ыкIи пчы­хьэрэ сыхьатыр 7-м къыще­гъэжьагъэу 10-м нэс икъоу къатIупщыщт, нэмыкI уахъ­тэхэм агъэмэкIэщт. Арышъ, ащ зе­шъумыгъэгъащт.

ГумэкIыгъо щымыIэжьыным фэшI

Мыекъопэ псырыкIопIэшхор жъы зэрэхъугъэм ыкIи къу­шъхьэхэм псыр ащымакIэу къызэрэхэкIырэм апкъ къикIэу иIофшIэн бэрэ зэщэкъо ыкIи цIыфхэр гумэкIыгъо хедзэх. Ар дэгъэзыжьыгъэ хъуным пае псырыкIопIакIэм изичэзыу ишIын 2018-рэ илъэсым рагъэ­жьагъ. АщкIэ IэпыIэгъу хъугъэ федеральнэ гупчэр ыкIи Къэралыгъо Думэм АдыгеимкIэ идепутатэу Владислав Резник ащ тегъэпсыхьагъэу чанэу Iоф зэришIагъэр.

ПсырыкIуапIэм икъутэмакIэ километри 120-рэ фэдиз икIы­хьэгъэщт ыкIи псыхъохэу Пщэх­рэ Пщэхашъхьэрэ ипсыкъэ­кIопIэщтых.

Ащ ишIуагъэкIэ джы Iоф зышIэрэ псырыкIуапIэми, ашIыщтыми икъоу къэлэдэсхэми, Мыекъопэ районым щыпсэу­хэрэми псыр аIэкIагъэхьащт, Адыгеим икъушъхьалъэхэм язе­кIо комплексхэми хэхъоныгъэ арагъэшIыщт.

Шъугу къэдгъэкIыжьын, псырыкIопIакIэм ишIын зырагъэ­жьэгъагъэр 2008-рэ илъэсыр ары, километрэ 50-м ехъу ашIыгъэу IофшIэнхэр 2014-м къызэтырагъэуцогъагъэх. Зыпау­блэ­­жьыгъэм къыщегъэжьагъэу ящэ­нэрэ илъэс хъугъэу чэ­зыу-чэзыоу псэолъэшIыныр рагъэ­кIокIы, ащ тегъэпсыхьэгъэ мылъкоу сомэ миллиарди 3,5-у къатIупщыгъэм щыщэу сомэ миллиарди 2,4-р агъэфедэгъах, IофшIэнхэр мы илъэсым ыкIэм аухынхэу агъэнафэ.

Черемушкэм щыпсэухэрэм апайи къэбарышIу щыI — Къум­пIыл Мурат иинтернет нэкIубгъохэм къызэращитхы­гъэмкIэ, псэу мы районым щыпсэухэрэм къаIэкIахьэрэм иукъэбзын зэшIозыхыщт псэуа­лъэм игъэуцун джырэ уахътэм дэлажьэх.

«КъэлэдэсхэмкIэ мэхьэнэ ин зиIэ къэбарымкIэ садэгуа­щэ сшIоигъу. Артезианыпсыр гъо­жьышэ къэзышIырэ гъу­чIыр хэ­щыгъэнымкIэ Iоф­шIэнхэр ыкIэм фэкIох. ГумэкIыгъоу цIыфхэр зыхэтхэр шIэхэу дэгъэзыжьыгъэ хъущт. Мы Iофым пылъхэм тыкъызэрагъэгугъэрэмкIэ, псэуа­лъэр мэзитIукIэ атыщт», — къыт­хыгъ КъумпIыл Мурат.

Къэбарыр къэзыгъэхьазырыгъэр МэщлIэкъо Саид.