Амалэу аIэкIэлъхэм ахэхъощт
УФ-м и Президент Федеральнэ ЗэIукIэм фигъэхьыгъэ Джэпсалъэм къыщиIуагъ апшъэрэ еджапIэхэм (анахьэу шъолъырхэм ащыIэхэм) бюджет чIыпIэу яIэхэм илъэс къэс ахэгъэхъогъэн фаеу. Анахьэу апшъэрэ медицинэ еджапIэхэм студентхэр зэраштэхэрэм игъэкIотыгъэу ар къыщыуцугъ, шъолъырхэм анаIэ зытырагъэтын фэе лъэныкъохэр къыгъэнэфагъэх. 
Мы мафэхэм медицинэм иIофышIэхэр Адыгеим щымакIэх. Республикэм пае медицинэм икадрэхэр зыгъэхьазырхэрэр Мыекъопэ къэралыгъо технологическэ университетыр ары.
Университетым имедицинэ институт ипащэу НэмытIэкъо Хьазрэт къызэриIуагъэмкIэ, гъэрекIо «лечебное дело» зыфиIорэм изы бюджет чIыпIэ пэпчъ нэбгыри 10, педиатрием — нэбгыри 6 ащызэнэкъокъугъ.
«Лечебное дело» зыфиIорэмкIэ бюджет чIыпIэ 70-м щыщэу 44-р, педиатриемкIэ бюджет чIыпIэ 25-м щыщэу 16-р — целевоих. ГущыIэм пае, процентымкIэ зэбгъапшэхэмэ, целевой чIыпIэхэр процент 63 — 64-м шIокIыщтыгъэхэп. Владимир Путиным предложениеу къыхьыгъэмкIэ мы къэгъэлъэгъонхэр процент 70 — 75-м нэгъэсыгъэнхэ фае.
— Урысыем ишъолъырхэм заявкэхэу къатыгъэхэм ялъытыгъэу квотэхэр гъэпсыгъэнхэ фае. Ащ дакIоу апшъэрэ медицинэ еджапIэр къэзыухыгъэхэм IофшIэпIэ чIыпIэ зэрэрагъэгъотыщтымкIэ регионым гарантие къытын фае, — къыIуагъ УФ-м и Президент.
Ординатурэм илъэныкъохэу специалистхэр зыщимыкъухэрэм проценти 100-м кIахьэу целевой егъэджэн афызэхэщэгъэн фаеу Владимир Путиным ылъытагъ. Непэ Мыекъопэ къэралыгъо технологическэ университетым имедицинэ институт иординатурэ «хирургия» ыкIи «терапия» зыфиIохэрэ сэнэхьатхэмкIэ бюджетник 40 щеджэ. Ахэм ащыщэу «целевикхэр» нэбгырэ 13 ныIэп зэрэхъухэрэр, ар процент 50-м нахь макI.
Мединститутым ипащэ къызэриIуагъэмкIэ, «лечебное дело» зыфиIорэ сэнэхьатыр мыгъэ студенти 130-м зэрагъэгъотыщт. ГъэрекIо ахэм япчъагъэ 80-м ехъущтыгъ. Пащэм зэрилъытэрэмкIэ, анахь макIэми, ахэм азыныкъор ординатурэм чIэхьащт. Ау зэрагъэнэфагъэмкIэ, бюджет чIыпIэхэм япчъагъэ 20 мэхъу. НыбжьыкIэхэм ащыщхэр республикэм икIыщтых, нэмыкI шъолъырхэм ординатурэр къащаухыщт. Еджэным ыуж ахэм республикэм къагъэзэжьыщтмэ зыми ышIэрэп. Целевой егъэджэныр проценти 100-м зынагъэсыкIэ, мы сэнэхьатыр къыхэзыхыхэрэр регионым имыкIхэу гъэсэныгъэ зэрагъэгъотын алъэкIыщт. Ординатурэр къызаухыкIэ, ныбжьыкIэхэм яшъолъыр Iоф щашIэн фае, ащ ишIуагъэкIэ специалистхэм зэращыкIэхэрэм игумэкIыгъо дэгъэзыжьыгъэ хъущт.
КIарэ Фатим.