Урысые Федерацием и Президентэу Владимир Путиным ижъоныгъокIэ унашъо къыдыхэлъытэгъэ пшъэрылъышхохэм ягъэцэкIэн блэкIыгъэ илъэсым къэралыгъом ишъолъырхэм ащырагъэжьагъ.

Мы илъэсым IофшIэныр джыри нахь гъэлъэшыгъэн, ащ шIогъэшхо къытын фаеу елъытэ Адыгэ Республикэм и ЛIышъхьэу КъумпIыл Мурат. Ащ фэдэ пшъэрылъ афишIыгъ АР-м иминистрэхэм я Кабинет хэтхэм.

— Зэфэхьысыжьхэм къызэрагъэлъагъорэмкIэ, блэкIыгъэ илъэсым телъытэгъэ гухэлъхэр зэкIэ дгъэцэкIагъэх. Къэралыгъом ипащэ къыгъэуцугъэ пшъэрылъ шъхьаIэм — цIыфхэм ящыIэкIэ-псэукIэ нахьышIу шIыгъэным ылъэныкъокIэ республикэм зэшIуихыгъэр бэ. ЦIыфхэм апашъхьэкIэ социальнэ пшъэдэкIыжь зэрэтхьырэр къыд­гурыIозэ, дгъэнэфа­гъэр зэкIэ зэрэзэшIотхыгъэм мыщ дэжьым мэхьанэшхо иI. Шъолъырым иэкономикэ зыпкъ итэу хэхъоныгъэ ешIы. МыщкIэ Iофэу дгъэцакIэрэм федеральнэ гупчэм осэшIу къыфишIыгъ – 2019-рэ илъэсым ыкIэм грант IэпыIэгъу Адыгеим къыIэкIэ­хьагъ, — къыIуагъ КъумпIыл Мурат.

2020-рэ илъэсым джыри нахь шIогъа­бэ къыхьын, зэфэхьысыжь дэгъухэр фэхъунхэ зэрэфаер Адыгеим и ЛIышъхьэ къыхигъэщыгъ. АщкIэ къэралыгъом ипащэхэр республикэм къыготых, IэпыIэгъу къыфэхъух. Лъэпкъ проектхэм ягъэцэкIэн имызакъоу, шъолъырым социальнэ-экономикэ хэхъоныгъэ ышIыным ипрограмми бэкIэ щэгугъых. Мыщ къыдыхэлъытагъэу илъэситфым къы­кIоцI илъэс къэс сомэ миллиарди 2 тедзэу республикэм къыфатIупщыщт.

Федеральнэ мылъкур псынкIэу ыкIи шIуагъэ къытэу гъэфедэгъэныр анахь шъхьаIэу зэрэщытыр АР-м и ЛIышъхьэ хигъэунэфыкIыгъ.

— ЗэшIотхын фэе Iофыгъоу щыIэр джыри бэ, ахэм зэкIэми зэфэдэу мэхьанэшхо яI. ЦIыфхэр зыгъэгумэкIы­хэрэ щыкIагъэхэр дэгъэзыжьыгъэнхэр тиIофшIэнкIэ тиIэубытыпIэу, ахэм занкIэу тадэгущыIэзэ пшъэрылъэу къэуцухэрэр дгъэцэкIэнхэм тыпы­лъын фае, — къыIуагъ КъумпIыл Мурат.

(Тикорр.).