Бизнес цIыкIум ыкIи гурытым IэпыIэгъу ягъэгъотыгъэным фытегъэпсы­хьэгъэ программэм ишIуагъэкIэ Адыгеим ихъызмэтшIапIэхэм ащыщхэм IэкIыбым щызэхащэгъэ къэгъэлъэгъонышхоу зэрэдунаеу зыхэлажьэрэм япродукцие ащэнэу амал яIэ хъугъэ.

Предпринимательствэм IэпыIэгъу егъэгъотыгъэнымкIэ АР-м и Гупчи ащкIэ адеIагъ. Гъомылапхъэхэм, шъонхэм ыкIи ахэр зэрэзэкIоцIащыхьэ­хэрэ оборудованием я Дунэе къэгъэлъэгъонышхоу ANFAS FOOD PRODUCT 2020 зыфи­Iорэр Тыркуем икъалэу Анталием щэкIо. Щылэ мазэм и 15-м къызэIуахыгъ, и 18-м зэфашIы­жьыгъ. Ащ Адыгеим икIыгъэхэу хэлэжьагъэх дагъэ къэзышIырэ хъызмэтшIапIэу ООО-у «Мам­рыкъомрэ» адыгэ щыгъум ыкIи шхын халъхьэхэм якъыдэгъэ-­кIын пылъ унэе хъыз­мэтшIапIэу Хъуажъ Аслъан зипащэмрэ.

ПэшIорыгъэшъэу зэрагъэу­нэфыгъэмкIэ, Адыгеимрэ Тыр­куемрэ товарэу зэблагъэкIырэр, 2018-рэ илъэсым егъэп­шагъэмэ, проценти 129-кIэ 2019-рэ илъэсым нахьыбэ хъугъэ. Ар доллар миллионрэ мин 600-рэ ауас. Предпринимательствэм IэпыIэгъу егъэгъотыгъэнымкIэ АР-м и Гупчэ къызэрэщыхагъэщыгъэмкIэ, IэкIыбым продукциеу респуб­ликэм ыгъакIорэр нахьыбэ ышIын амал зэриIэр ащ къеушыхьаты.