2019-рэ илъэсым ияплIэнэрэ мэзищ хэбзэгъэуцугъэхэр зэрагъэцэкIагъэхэм зыщытегущыIэгъэхэ зэхэсыгъо Адыгэ Республикэм IофшIэнымкIэ и Къэралыгъо инспекцие джырэблагъэ зэхищагъ.

Ащ къырагъэблэгъагъэх АР-м ихэбзэ гъэцэкIэкIо ыкIи хэбзэухъумэкIо къулыкъухэм ялIыкIохэр, хъызмэтшIапIэхэм ыкIи организациехэм яIофышIэхэр.

Инспекцием ипащэу Сихъу Русетэ къызэриIуагъэмкIэ, инспекцием фитыныгъэу иIэр къызфигъэфедэзэ планым хэтэу ыкIи хэмытэу уплъэкIунхэр зэхещэх. Ахэм анахьэу анаIэ зытырагъэтырэр Iоф зышIэрэ цIыфыр хэбзэгъэуцугъэм диштэу IофшIапIэм щатхыгъэмэ е хэбзэнчъэу ащ Iоф рагъашIэмэ, ар IофшIапIэм аштэ зэхъум тэрэзэу итхылъхэр фагъэпсыгъэхэмэ, лэжьапкIэр зэрэфагъэнэфэгъэ шIыкIэр ыкIи ар игъом аратымэ ары. Джащ фэдэу федеральнэ хэбзэгъэуцугъэм къыпкъырыкIыхэзэ, организациехэм япащэхэу, предпринимательхэу цIыфхэр зыгъэлажьэхэрэм алъэныкъокIэ IофшIэнымкIэ хэбзэгъэуцугъэр зэрагъэцакIэрэм лъэп­лъэх. Ащ нэмыкIэу IофшIэныр щынэгъон­чъэным иамалхэр икъоу IофшIапIэ языгъэгъотыхэрэм къызыфагъэфедэхэмэ ауплъэкIух, сыда пIомэ пащэ пэпчъ ар ипшъэрылъ шъхьаI.

— ТыуплъэкIугъэхэу, хэукъоныгъэ къызыхэдгъэщыгъэ IофшIапIэхэм пшъэ­дэкIыжь ятымыгъэхьэу, тадэIэпыIэнэу, хэукъоныгъэр зэрэдагъэзыжьыщт шIыкIэр агурыдгъэIонэу ары мурадэу тиIэр, — еIо пащэм.

Инспекцием изэфэхьысыжьхэмкIэ, 2019-рэ илъэсым ияплIэнэрэ мэзищ Iоф­шIэнымкIэ хэбзэгъэуцугъэр зэрагъэ­цакIэрэм ехьылIагъэу юридическэ лицэхэм ыкIи унэе предпринимательхэм алъэныкъокIэ уплъэкIуни 130-рэ зэхищагъ. ЯIофшIэн фитыныгъэхэр зэраукъуа­гъэхэм къыхэкIэу нэбгырэ 229-мэ инспекцием зыкъыфагъэзагъ. ЯлэжьапкIэ игъом ыкIи икъоу арамытыгъэу дэо тхылъ 73-рэ, хабзэр аукъуи IофшIапIэм къыIуагъэкIыгъэу, IофшIэн зэзэгъыны­гъэу адашIыгъэр мытэрэзэу дэо тхылъ 54-рэ къыIэкIэхьагъ. УплъэкIун Iофтхьабзэу зэрахьагъэхэм къакIэлъыкIоу IофшIэнымкIэ хэбзэгъэуцугъэр гъогогъуи 159-рэ аукъуагъэу агъэунэфыгъ.

Зэзэгъыныгъэхэр адамышIыгъэхэу ыкIи IофшIапIэхэм аIумытхагъэхэу нэбгырэ 13 къыхагъэщыгъ. Инспекцием иунашъокIэ цIыфхэм IофшIэн языгъэгъотыхэрэм хэукъоныгъэхэр дагъэзыжьыгъэх.

Инспекцием иIофышIэу Сергей Абрамцевым къызэриIуагъэмкIэ, анаIэ зытырагъэтыхэрэм ащыщ лэжьапкIэр игъом цIыфхэм аратыныр, IофшIапIэм шъобж­хэр атещагъэхэ щымыхъунхэр. Мы илъэсым иящэнэрэ илъэс плIанэ лэжьапкIэхэм ятын фэгъэхьыгъэу уплъэкIун 27-рэ инспекцием зэхищагъ, хэукъоныгъэ 39-рэ къыхагъэщыгъ. Нахьыбэу лэжьапкIэр зыгъэгужъогъэ IофшIапIэхэми ацIэ къыриIуагъ. Ахэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Бемхолдинг» ыкIи Шэуджэн районым иIофшIапIэу «Жилкомсервис» зыфиIохэрэр арых. ЛэжьапкIэм итынкIэ мыхэм зэхэтэу сомэ миллионым ехъу чIыфэу къатефэгъагъ. Мы уахътэм ехъу­лIэу цIыфхэм ялэжьапкIэ аратыжьыгъ.

Мы пIалъэм къыриубытэу IофшIапIэм щыIэхэу нэбгырэ 11-мэ тыркъохэр, нэбгыритIумэ шъобж хьылъэхэр атещагъэхэ хъугъэ.

Мы илъэсым кIэу къыхэхьагъэхэми пащэм ягугъу къышIыгъ. 2020-рэ илъэсым къыщегъэжьагъэу цIыфым иIофшIэгъу илъэсхэр зыдатхэхэрэ тхылъыр электроннэ шIыкIэм тырагъэхьащт. Мы шIыкIэр бгъуитIумкIи нахь гупсэф ыкIи Iэрыфэгъу хъунэу мэгугъэх. Егъэзыгъэ Iофэу щымытэу, цIыфхэм яшIэ хэлъэу яшIоигъоныгъэкIэ электроннэ шIыкIэм тырагъэхьащтых. Ащ ишIуагъэкIэ цIыфхэм яэлектроннэ тхылъхэм арытхэгъэ къэбарым къэралыгъо фэIо-фашIэхэр зыщагъэцэкIэхэрэ порталыр къызфагъэфедэзэ Урысыем ПенсиехэмкIэ ифонд исайт зыщыщагъэгъозэн алъэкIыщт.

КIАРЭ Фатим. Сурэтхэр Iэшъынэ Аслъан тырихыгъэх.