Урысые Федерацием исубъектхэм ащыщэу 2019-рэ илъэсым лъэпкъ проектхэм апэIуа­гъэхьащт ахъщэу хабзэм къаритыгъэр нахь чаныгъэ хэлъэу зыгъэфедагъэхэр къэра­лыгъо системэ зыкIэу «Электронный бюджет» зы­фиIорэм къыгъэлъэгъуагъ.

Чэчэн Республикэр субъект­хэм апэ ишъыгъ. Сомэ миллиард 12,8-у къыфатIупщыгъэм щыщэу процент 77,4-р Iоф­шIэнхэм ахилъхьагъ. ЯтIонэрэ чIыпIэр Адыгэ Республикэм ыубытыгъ, сомэ миллиарди 2,9-м ипроцент 75,5-р ыгъэфедэн ылъэкIыгъ. Ящэнэрэ чIыпIэр Москва ыхьыгъ. Ауж къинэгъэ субъектхэм Еврей хэкур, Дагъыстан, Тверской хэкур ахэтых. Къэнагъэхэм къа­IэкIагъэхьэгъэ мылъкум ызы­ныкъо нахьыбэр проектхэм ягъэцэкIэн пэIуагъэхьагъ.

Лъэпкъ проектхэм хабзэм зызкIафигъэзагъэр тыгу къэдгъэкIыжьын. ЦIыфхэм япсэукIэ къызэрэIэтыгъэн фаем, социальнэ Iофыгъохэр зэрэзэшIуа­хыщтхэм, щыIакIэр нахьышIу зэрэхъущтым фэгъэхьыгъ къэралыгъо программэу «О на­циональных и стратегических задачах развития Российской Федерации на период до 2024 года» зыфиIорэм пащэхэри цIыфхэри щэгугъых. Программэр илъэситфыкIэ агъэцэкIэн фае, ахъщэ IэпыIэгъур федерацием къетIупщы. Апэрэ илъэсэу пыкIыгъэм шъолъыр пстэумэ IэпыIэгъу зэрящыкIагъэр, мылъкоу къатIупщырэр теубытагъэ хэ­лъэу зэрагъэфедэн фаер къыгъэлъэгъуагъ.

УрысыемкIэ Адыгеир ятIонэрэ зэрэхъугъэм мэхьанэ иI. Проектым къыдилъытэхэрэ Iофыгъохэр зэрэзэшIуахыщтхэм яшъыпкъэу Iоф дэзышIэхэрэ шъолъыр пащэхэм къафатIупщырэ ахъщэ IэпыIэгъур зэпа­гъэущтэп. Программэ зэфэ­шъхьафхэми ахэлажьэзэ, ахъщэ тедзэхэри къыратыхэу мэхъу. Мары зиамалхэр мыин шъо­лъырипшIым тэ тиреспублики ахэфагъ. Урысые Федерацием мэкъу-мэщ хъызмэтымкIэ и Министерствэ ипащэу Дмитрий Патрушевыр кураторэу къытапхыгъ, республикэм зыкъегъэ­IэтыгъэнымкIэ ишIуагъэ къе­гъакIо.

Социальнэ ыкIи экономическэ хэхъоныгъэхэр Адыгеим зэришIыщтхэм пае стратегическэ программэу республикэм щаштагъэм нэIуасэ зыфишIыгъ ыкIи къыдыригъэштагъ. МэкIэ-макIэу тищыIакIэ зэхъокIыныгъэхэр зэрэфэхъухэрэр къа­лэхэми къуаджэхэми ащы­псэухэрэ цIыфхэм зэхашIэ ыкIи алъэгъу.

Гъогухэр, еджапIэхэр, кIэлэцIыкIу IыгъыпIэхэр Адыгеим щагъэпсых, спортивнэ залхэр, площадкэхэр кIэу къызэIуахых, чIыгур дэгъоу алэжьы, къэлэ щагухэр зэтырагъэпсыхьажьых… Ахэр зэкIэ апэрэ лъэбэкъух. ОхътакIэм, ЛIышъхьакIэм, Премьер-министракIэу Михаил Ми­шустиным, ащ зэхищэрэ ПравительствакIэм тащыгугъыщт. Якъарыурэ яшIэныгъэхэмрэ зэ­халъхьэхэмэ, ахэм цIыфхэр нахьышIум фащэнхэ алъэкIыщт.

ИлъэсыкIэу къихьагъэм иапэ­рэ зэхэсыгъоу АР-м и ЛIышъхьэ зэхищэгъагъэм къыщиIуагъ тапэрэ илъэситфым къыкIоцI Адыгеим исоциальнэ Iофыгъохэмрэ экономикэм изыкъегъэIэтынрэ ахалъхьанэу сомэ миллиарди 2 зырыз федеральнэ бюджетым къызэрэтфитIупщыщтыр. Угу бгъэкIоды хъущтэп, пэщэ ныбжьыкIэхэм тинеущрэ мафэ ятпхыщт.