— УФ-м и Президентэу Владимир Путиным Джэпса­лъэу къышIыгъэм хэгъэгу кIоцI ыкIи IэкIыб политикэм илъэ­ныкъо шъхьаIэхэмкIэ илъэсэу тыз­хэхьагъэм ыкIи къыкIэлъыкIощтхэм шIэгъэн фаеу ылъэгъухэ­рэр къыщыриIотыкIы­гъэх, къэралыгъом хэхъоныгъэхэр ышIынхэм фытегъэпсыхьагъэу анахьэу анаIэ зытырагъэтыщтхэр къыгъэ­нэфагъэх, хэбзэ къулыкъухэм пшъэрылъхэр къафигъэуцугъэх.

Илъэсыбэ IофшIагъэхэм къа­гъэлъэ­гъуагъэхэм, Iофыгъоу щыIэхэм яанализэу ашIыгъэхэм къапкъырыкIызэ ахэр дэгъэзы­жьыгъэ зэрэхъущт шIыкIэхэр Джэпсалъэм къыщыриIотыкIы­гъэх. Анахьэу демографием ызыкъегъэIэтын, гъэсэныгъэр, псауныгъэм икъэу­хъумэн алъэ­ныкъокIэ Iофыгъоу щыIэхэм ядэгъэзыжьын, ахэм афэгъэхьыгъэ зэхъо­кIы­ныгъэу Урысые Федерацием и Конституцие фэ­шIыгъэн фаехэр ары Владимир Путиным зигугъу къышIыгъэр. А зэпстэур щыIэныгъэм щыпхырыщыгъэ хъумэ субъект­хэм хэхъоныгъэхэр зэра­шIыщт­хэм, цIыфхэм ящыIэкIэ-псэукIэ нахьышIу хъуным ахэр зэрэфэIорышIэщтхэм сицыхьэ телъ. Джы хэбзэгъэуцу къулыкъу­хэм пшъэ­рылъ шъхьаIэу яIэр къэралы­гъом ипащэ зигугъу къышIыгъэхэр законхэмкIэ агъэ­пытэжьынхэр ары.

УФ-м и Президент и Джэ­псалъэ къы­щыхигъэщыгъэ Iоф­хэм парламентариехэм, партиеу «Единэ Россием» ифракцие хэтхэм, хэбзэ гъэцэкIэкIо органхэр къыхэлажьэхэзэ, Iоф адашIагъ. Джыри мары къэралыгъом ипащэ пшъэрылъэу къыгъэуцугъэхэр гъэцэкIэгъэнхэм фытегъэпсыхьэгъэ Iофтхьабзэу зэшIохы­гъэн фаехэр дгъэ­нэфэщтых. Ахэм комитетхэм ащыхэплъэнхэшъ, нэужым Къэ­ралыгъо Советым — Хасэм изэхэсыгъо къыхэтлъхьащтых.