— УФ-м и Президентэу Владимир Путиным илъэс къэс къышIырэ Джэпса­лъэм къыпкъы­рыкIыхэзэ къэралыгъо хэбзэ къулыкъухэми, партиеу «Единэ Россием» ишъолъыр къутами Iофэу ашIэщтыр агъэнафэ.

ЦIыфэу депутатхэм за­къыфэзыгъа­зэхэрэм, «Единэ Россием» иобщественнэ приемнэ къеуалIэхэрэм упчIэу къа­Iэтыхэрэм а­щыщыбэ Владимир Путиным и Джэпсалъэ къыщыхигъэщыгъ. Ау Адыгеим исхэм язакъоп, къэралыгъом щыпсэухэрэм янахьыбэр зыгъэгумэкIырэ лъэ­ныкъуабэмэ ащ ягугъу къы­шIыгъ. Анахьэу социальнэ лъэныкъор, демографием изыкъегъэIэтын, унагъоу зи­гъот макIэ­хэм Iэпы­Iэгъу ятыгъэныр, кIэлэегъаджэхэм, медицинэм иIо­фышIэхэм ялэ­жьапкI, гъэсэныгъэм иIофхэр ары ахэр зыфэгъэхьыгъагъэ­хэр, нэмыкIэу мы илъэсым ыкIи тапэкIэ Iоф зыдэшIэгъэн фаехэр къыхигъэщыгъэх.

Къэралыгъом ипащэ пшъэ­рылъ гъэнэфагъэхэр къышIы­гъэх. Ахэр гъэцэкIагъэ зэрэхъу­щтымкIэ предложениехэр тыугъоищтых, татегущыIэщт. Мыщ дэжьым хэдзакIохэм яшIошIи къыщыдэлъытэгъэ­ныр шIокI зи­мыIэ Iофэу щыт.

Къыхэзгъэщымэ сшIоигъор УФ-м и Президент и Джэпсалъэ зэшIохыгъэн фаеу къыщыгъэнэфагъэхэм мылъкоу апэIухьащтыр шъолъырхэм ябюджет имыза­къоу, федеральнэми къы­зэ­рэ­хэхыгъэщтыр ары. Ар субъектхэмкIэ IэпыIэгъушхо хъущт.