КIэлэцIыкIухэм языгъэпсэфыгъо уахътэ гъэшIэгъонэу агъэкIоным фэшI концертхэм, зэIукIэгъухэм ахэлажьэх. Ны-тыхэр, кIэлэегъаджэхэр ягъусэхэу Iофтхьабзэхэр рагъэкIокIых.

Адыгэ Республикэм и Къэралыгъо филармоние Гофман ипшысэ техыгъэу «Щелкунчик ыкIи Пачъыхьэр» зыфиIорэр театрализованнэ шIыкIэм техыгъэу къыщагъэлъэгъуагъ. Музыковедэу Хьакъуй Заремэ зэхахьэр зэрищагъ.

Филармонием къыщызэIуахыгъэ къэгъэлъэгъуапIэм пшысэм техыгъэ пычыгъохэр дискым тет­хагъэхэу кIэлэцIыкIухэм щалъэгъугъэх. Пшысэр нахь гурыIогъошIу къэзышIыгъэр З. Хьакъуим едзыгъохэр IупкIэу къызэриIотагъэхэр ары.

Республикэм и Къэралыгъо филармоние исимфоническэ оркестрэ идирижер шъхьаIэу, Адыгэ Республикэм изаслуженнэ артистэу Аркадий Хуснияровыр япащэу пшысэм техыгъэ орэдышъоу П. Чайковскэм ыусыгъэр музыкантхэм дахэу къырагъэIуагъ.

Иисус Христос къызыхъугъэ мафэм ехьылIэгъэ зэхахьэри гум шIукIэ къинэжьынэу филармонием щыкIуагъ. Адыгэ Хасэм, къэзэкъхэм, къэндзалхэм ялIыкIохэр Iофтхьабзэм чанэу хэлэжьагъэх.

Къэндзалхэм якупэу «Дуслыкым» ипащэу Алям Ильясовым илъэпкъэгъухэр игъусэхэу зэхахьэм къэкIуагъ. Лъэпкъхэм языкIыныгъэ игъэпытэн респуб­ликэм мэхьэнэ ин зэрэщыратырэр зэдэгущыIэгъум щыхигъэу­нэфыкIыгъ. Къэзэкъхэм якуп ипащэу Александр Даниловыр кIэлэцIыкIухэм аIукIагъ.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ипащэ игуадзэу Константин Щербаковыр общественнэ движениехэм ялIыкIохэм аIукIагъ. Лъэпкъ зэфэшъхьафхэм мэфэкIыр зэрэзэдагощырэм осэ ин фишIыгъ.

Хэгъэгум, дунаим ащыцIэрыIо ансамблэу «Казачатэм» мэфэкI зэхахьэр къыгъэдэхагъ. Купым ипащэу Дмитрий Гордиенкэм тызэрэщигъэгъозагъэу, зэIукIэгъум дэгъоу зыфагъэхьазырыгъ. «Казачатэм» орэдхэр къыIуагъэх, лъэпкъ къашъохэр къышIыгъэх. ИлъэсыкIэм фэгъэхьыгъэ къэгъэлъэгъонхэм артистхэр, художественнэ купхэм ахэтхэр арагъэблэгъагъэх.

МэфэкI джэгунхэр, хырыхы­хьэхэр, IорыIуатэхэр, усэхэр кIэлэцIыкIухэм лъэшэу ашIогъэ­шIэгъоныгъэх.

Сахьидэкъо Нурбый.