Фэтэрыбэу зэхэт унэхэм ащыпсэухэрэм зэдагъэфедэхэрэр гъэкIэжьыгъэнхэмкIэ Адыгэ республикэ фондым охътэ кIэкIым телъытэгъэ гухэлъым игъэцэкIэн ыухыгъ.

Фэтэрыбэу зэхэт унэхэм игъэкIотыгъэ гъэцэкIэжьынхэр яшIылIэгъэнхэм фытегъэпсыхьэгъэ шъолъыр программэм къыдыхэлъытагъэу 2017 — 2019-рэ илъэсхэм унэ 319-рэ зэтырагъэпсы­хьагъ, ащ сомэ миллион 584-рэ пэIуа­гъэхьагъ.

Фэтэрыбэу зэхэт унэхэм ащыпсэу­хэрэм зэдагъэфедэрэ амыгъэкощырэ мылъкум игъэкIотыгъэ гъэцэкIэжьынхэр ешIылIэгъэнхэмкIэ цIыфхэм къаугъоирэ ахъщэр нахьыбэ зэрэхъугъэм, 2019-рэ илъэсым мыщкIэ чIыфэм хэпшIыкIэу къызэрэщыкIагъэм яшIуагъэкIэ пшъэ­рылъхэр зэрифэшъуашэу зэшIохыгъэхэ хъугъэх. Фэтэрыбэу зэхэт унэ 81-мэ гъэцэкIэжьынхэр ащыкIонхэу щытыгъ, ау чIыфэр къызэрэзэкIагъэ­кIожьыгъэм къыхэкIыкIэ а пчъагъэр 105-м нэсыгъ. ЗэкIэмкIи ащ сомэ миллиони 168,6-рэ тефагъ.

Адыгэ Республикэм псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэритырэмкIэ, гъэцэкIэжьынхэм апэIухьащт ахъщэм иугъоин процентишъэм ехъу, мыщкIэ шъолъырым имуниципалитетхэм зэкI пIоми хъунэу пшъэрылъыр агъэцакIэ. 2019-рэ илъэсыр пштэмэ, аугъоигъэр проценти 108,2-м ехъу. 2018-рэ илъэсым мы къэгъэлъэгъоныр процент 84-м шIокIыщтыгъэп.

Арэу щытми, игъэкIотыгъэ гъэцэкIэжьынхэм апэIухьащт ахъщэм иугъоинкIэ чIыфэу ателъыр нахь макIэ шIыгъэным фытегъэпсыхьэгъэ IофшIэныр республикэм щылъагъэкIуатэ. 2019-рэ илъэсым тыгъэгъазэм и 30-м ехъулIэу фэтэрыбэу зэхэт унэхэм ащыпсэурэ нэбгырэ мин 16,8-м ехъумэ зэкIэмкIи чIыфэу ателъыр сомэ миллиони 171,3-рэ мэхъу. Мыщ дэжьым зигугъу ашIы­хэрэр сомэ минрэ ныкъорэм ехъоу чIыфэ зэIузыгъэкIагъэхэр арых.

Ахъщэр игъом къэзымытхэрэм алъэныкъокIэ Iофхэр къызэIуахых. ГущыIэм пае, хьыкум приставхэм зэхафынхэу сомэ миллион 63,5-рэ зытефэрэ мыщ фэдэ Iоф 7289-рэ аIэкIагъэхьагъ, къызэкIагъэкIожьын алъэкIыгъэр сомэ миллион 18,6-рэ. 2019-рэ илъэсым хьыкум приставхэм сомэ миллион 48,5-рэ зытефэрэ Iоф 5200-рэ аIэкIэлъыгъ, къапщыныжьыгъэр сомэ миллион 14,5-рэ мэхъу.

(Тикорр.).