Апэрэ зэхэсыгъо иIагъ
Монополием пэшIуекIогъэнымкIэ федеральнэ къулыкъум АР-мкIэ и ГъэIорышIапIэ щызэхэщэгъэ Общественнэ советым иапэрэ зэхэсыгъо бэмышIэу щыIагъ. 
Общественнэ советым хэхьагъэх общественнэ объединениехэм, профессиональнэ ыкIи творческэ союзхэм, IофшIапIэ языгъэгъотыхэрэм ыкIи ахэм яассоциацие, социальнэ купхэм, мыкъэралыгъо ыкIи коммерцием пымылъхэ IофшIапIэхэм ялIыкIохэр.
Iофтхьабзэр къызэIуихызэ монополием пэшIуекIогъэнымкIэ федеральнэ къулыкъум АР-мкIэ и ГъэIорышIапIэ ипащэу ХьапэкIэ Аслъан Общественнэ советым хэтхэм шIуфэс къарихыгъ. Монополием пэшIуекIогъэнымкIэ шъолъыр гъэIорышIапIэм иIофшIэн епхыгъэу общественнэ лъыплъэнымкIэ къулыкъукIэ зэрагъэпсыгъэм ыкIи нэкъокъон политикэр АР-м зэрэщагъэцакIэрэм ямэхьанэ къыриIотыкIыгъ.
— Советым хэхьагъэх общественнэ IофшIэным хэшIыкIышхо фызиIэхэ цIыфхэр. Ащ къыхэкIэу сицыхьэ телъ Советым хэтхэм дэгъоу Iоф зэрашIэщтым ыкIи япшъэрылъхэр щытхъу хэлъэу зэрагъэцэкIэщтхэм, — къыIуагъ гъэIорышIапIэм ипащэ.
Советым хэтхэм япшъэрылъхэр зыфэдэхэр Iофтхьабзэм къыщаIуагъэх. Анахь лъэныкъо шъхьаIэу къыхагъэщыгъэхэм ащыщ общественнэ мэхьанэ зиIэхэ шэпхъэ-правовой актхэм япроект ихэплъэн, чIыпIэ къулыкъухэм уплъэкIун IофшIэнхэу ащагъэцакIэхэрэр зэфэхьысыжьыгъэнхэр, къолъхьэ тын-Iыхыным ылъэныкъокIэ уплъэкIунхэр ашIынхэр ыкIи гъэIорышIапIэм иIофшIэн уасэ фэшIыгъэныр, нэмыкIхэри.
Iофтхьабзэм дакIоу Общественнэ советым итхьаматэ ыкIи ащ игуадзэ хадзыгъ. Джащ фэдэу тапэкIэ Iоф зыдашIэщтхэ лъэныкъохэр агъэнэфагъэх.
Шъугу къэдгъэкIыжьын, Общественнэ советыр зыкIызэхащагъэр УФ-м ицIыфхэм щыкIагъэу яIэхэм ыкIи яшIоигъоныгъэхэм защыгъэгъозэгъэныр, цIыфхэм яфитыныгъэ ыкIи яшъхьафитыныгъэ, джащ фэдэу общественнэ объединениехэм, коммерцием емыпхыгъэхэ организациехэм яфитыныгъэхэр къэухъумэгъэнхэр арых. Общественнэ советыр зэхэгущыIэжьын-уплъэкIун къулыкъоу щыт ыкIи ащ унашъохэр ышIынхэ ылъэкIыщт. Советыр илъэси 3 пIалъэ иIэу зэхащагъ. Ащ хахьэхэрэп чIыпIэ къулыкъухэм яIофышIэхэр, арэу щытми, Общественнэ советым иIофшIэн агъэцакIэ. Советым пащэ фашIыгъ монополием пэшIуекIогъэнымкIэ федеральнэ къулыкъум АР-мкIэ и ГъэIорышIапIэ ипащэ игуадзэу ЖэнэлI Аслъан.
КIАРЭ Фатим.