Top.Mail.Ru

Псэуалъэхэм яшIын лъагъэкIуатэ

Image description

«Зеленая» энергетика» зыфаIорэм хэхъоныгъэхэр Адыгеим щешIых. ЖьыкIэ Iоф зышIэщт паркэу Урысыем итхэм анахь иным ишIын фэгъэхьыгъэ проектыр ыкIэм нэсыгъ. Ащ дакIоу тыгъэм иамалкIэ Iоф зышIэщт электростанциитIу шъолъырым щашIынэу рагъэжьагъ. Ахэр станицэу Ханскэм ыкIи къуаджэу Мамхыгъэ ащагъэуцущтых.

Адыгэ Республикэм и ЛIышъхьэу КъумпIыл Мурат иинстаграм нэкIубгъо къызэрэритхагъэмкIэ, проектыр зэрифэшъуашэу республикэм щыгъэцэкIагъэ хъуным климатыр фэIорышIэ. Ти­шъолъыр гурытымкIэ тыгъэр къызепсырэ мэфэ 250-рэ щэIэ. 2018-рэ илъэсым Урысые инвестиционнэ форумэу Шъачэ щыкIуагъэм тыгъэм иамалкIэ Iоф зышIэщтхэ электростанциехэм яшIын фэгъэхьыгъэ зэзэгъыныгъэм щыкIэтхагъэх.

— «Зеленэ» энергетикэм хэхъоныгъэ ышIыным фытегъэ­псыхьэгъэ IофшIэным ишIуагъэкIэ республикэм энергэкIуачIэу IэкIэлъыр нахьыбэ хъуным тыщэгугъы. Ащ фэдэ екIолIакIэм амалышIухэр къытыщтых, Адыгеим иэкономикэ хэхъоныгъэ ышIыным, проектыкIэхэр гъэцэкIэгъэнхэм афэIорышIэщт, — къы­хигъэщыгъ АР-м и ЛIышъхьэ.

(Тикорр.).