Адыгеим щыпсэухэрэм ащыщыбэм УФ-м ПенсиехэмкIэ ифонд и Къутамэу АР-м щыIэм упчIэ зэфэшъхьафхэмкIэ зыфагъазэ. Анахьыбэу цIыфхэр зыгъэгумэкIыхэрэм яджэуапхэр нэмыкIхэми алъыIэсынхэу къыхэтэутых.

УпчIэ: Сишъхьэгъусэ 2018-рэ илъэсым пенсием кIонэу щытыгъ, ау баллэу иIэр икъугъэп. Джы тызэрэпсэущтыр тшIэрэп. IофшIапIэ ыгъотырэп, цIыфхэм Iоф­шIапIэ ягъэгъоты­гъэнымкIэ къулыкъум иучети ха­гъэуцорэп, «пенсием шъуеж» къытаIо. Сишъхьэгъусэ 1981-рэ илъэсым къыщыублагъэу 1985-м нэс хьапсым чIэсыгъ, ау ащыгъуми Iоф ышIагъ, кIэлъэпIупкIэр ытыщтыгъ. Сыда ПенсиехэмкIэ фондым а уахътэр IофшIэгъэ илъэс­хэм зыкIахимы­лъытагъэр?

Джэуап: Я 400-рэ Федеральнэ законэу 2015-рэ илъэсым ищылэ мазэ и 1-м кIуачIэ зиIэ хъугъэм къызэрэщыдэлъытагъэмкIэ, хъулъфыгъэу 2018-рэ илъэсым пенсием кIонэу фитыныгъэ зиIэ хъущтыгъэр зы­ныбжь илъэс 60-м нэсыгъэу, IофшIэгъэ илъэсхэмрэ (ащыгъум илъэси 9-гъ) унэе коэффициент анахь макIэмрэ (ащыгъум 13,8-рэ зэрэхъущтыгъэр) изыгъэкъугъэ­хэр ары.

ЦIыфым Урысые Федерацием Iоф щишIагъэу, страхованиемкIэ взносхэр ПенсиехэмкIэ фондым фатыгъэхэмэ, а уахътэр IофшIэгъэ илъэсхэм ахэхьэ. Взносхэр фамытыгъэхэми, IофшIэгъэ илъэсхэм ахэлъытэгъэн фэе уахътэхэри законым ия 12-рэ статья щыгъэнэфагъэх.

Джы хэбзэгъэуцугъэу щыIэм къызэрэщыдэлъытагъэм тетэу, хьапсым чIэсыгъэм ащ Iоф зэрэщишIагъэр иIофшIэгъу илъэс­хэм захалъытэрэр 1992-рэ илъэсым иIоныгъо мазэ и 1-м къыщыублагъ. ГухэкIми, 1981 — 1985-рэ илъэсхэр ащ къыхиубытэхэрэп. Арышъ, уишъ­хьэ­гъу­сэ пенсиер фагъэпсыным пае баллхэр ригъэкъунхэ фаеу мэхъу.

УпчIэ: 2019-рэ илъэсэу икIыгъэм ижъоныгъокIэ мазэ типенсиехэм сомэ мин тIурытIу къахэ­хъуагъэу къытатыгъэх. Нэужым ар тырахыжьыгъэу, ыпэкIэ зэрэщытыгъэм тетэу къытфэкIо. Сыда ар къы­зхэкIыгъэр?

Джэуап: НахьыпэкIэ шап­хъэу щыIагъэхэм атетэу пенсиехэмрэ мазэ къэс къатыхэрэ ахъщэ тынхэмрэ индексацие зэрашIыгъэхэр къыдэлъытагъэ­хэу социальнэ пенсиехэм ахъщэ тедзэ­хэр къафашIыщтыгъэх. Ащыгъум пенсием къыхахъощтыгъ, ау социальнэ ахъщэ тедзэр нахь макIэ хъущтыгъ. Ащ ыпкъ къи­кIэу зэхэубытагъэу цIыфым къыфакIорэм зэхъокIыныгъэ фэмыхъоу е къыщыкIэу бэрэ хъущтыгъэ.

Ащ фэшI УФ-м и Президент иунашъокIэ шапхъэхэм зэхъо­кIыныгъэхэр афашIыгъэх ыкIи 2019-рэ илъэсым имэлылъфэгъу мазэ ахэм кIуачIэ яIэ хъугъэ. ШэпхъакIэхэм адиштэу социальнэ ахъщэ тедзэхэр икIэрыкIэу ПенсиехэмкIэ фондым къы­лъытэжьыгъэх.

ЗыкIалъытыкIыжьхэм ыуж федеральнэ социальнэ ахъщэ тедзэ къызэратырэ нэбгырэ 20355-у республикэм исым пэпчъ зэхэубытагъэу къыфа­кIорэр, гурытымкIэ лъытагъэу, сомэ 8515-рэ хъугъэ. Ар сомэ 377-кIэ нахьыпэкIэ къыфакIощтыгъэм нахьыб. ШэпхъакIэхэм адиштэу къызалъытэжьхэм, щылэ мазэм и 1-м къыщыублагъэу мэлылъфэгъум и 30-м нэс къыдалъытагъ. Ащ фэшI къахэ­хъуа­гъэр, гурытымкIэ лъыта­гъэу, сомэ 1349-рэ хъугъэ.

Нэбгырэ пэпчъ къыфакIорэр зэфэшъхьафти, шъо сомэ мин тIурытIу къышъуатынэу хъугъэ. Ау ар зэтыгъуагъ. Нэужым, мэкъуогъу мазэм къыщыублагъэу, мазэм къыхэхъуагъэр хэтэу къатынэу падзэжьыгъ.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.