Ны мылъкум къыхэхыгъэу ахъщэ тын унагъом къыфэкIонэу ыгъэпсын ылъэкIынэу закон зыщыIэр 2018-рэ илъэсым ищылэ мазэ и 1-м къы­щыублагъ. Ащ ыуж ящэнэрэ ыкIи ащ къыкIэлъыкIорэ сабый къы­зэ­ры­хъухьагъэхэ унагъохэр арых къыхиубытэхэрэр.

Законым къызэрэщыдэлъытагъэм тетэу, кIэлэцIыкIур зэры­псэун ылъэкIыщт ахъщэ анахь макIэу субъектым щыгъэнэфагъэм фэдиз ахъщэ тынэу агъэ­нафэрэр. АдыгеимкIэ 2019-рэ илъэсым ар сомэ 9104-рэ хъущтыгъэ. 2020-у къихьагъэм а пчъагъэр сомэ 9599-м нагъэсыгъ, ау ащ фэдиз зыфагъэ­нэфэщтхэр мы илъэсым лъэIу тхылъыр зытыхэрэр ары, блэкIыгъэм зыфагъэнэфэгъахэхэм сомэ 9104-р ары къафэкIощтыр.

Законым блэкIыгъэ илъэсым зэхъокIыныгъэхэр фашIыгъэх ыкIи 2020-рэ илъэсым ищылэ мазэ и 1-м къыщыублагъэу ахэм кIуачIэ яIэ хъугъэ. НахьыпэкIэ унагъом гъотэу иIэр нэбгырэ пэпчъ телъытагъэмэ, зым те­фэрэр цIыфыр зэрыпсэун ылъэ­кIыщт ахъщэ анахь макIэм фэдизрэ ныкъорэм кIэмыхьэмэ ахъщэ тыныр фагъэнафэщтыгъ. Джы ахъщэ анахь макIэм фэдитIу имыкъумэ ары ны мылъкум къыхэхыгъэ ахъщэ тыныр къызыратыщтыр.

ЦIыфыр зэрыпсэун ылъэкIыщт ахъщэ анахь макIэу 2019-рэ илъэсым иятIонэрэ квартал агъэнэфагъэр сомэ 10103-рэ мэхъу. ГущыIэм пае, унагъом нэбгыриплI щыпсэоу, зэкIэмкIи зэхэубытагъэу сомэ 80824-рэ къаIэкIэмыхьэмэ, ахъщэ тыныр къыфэкIонэу ыгъэпсын фит. КъызэрэтIуагъэу, къыфэкIощтыр сомэ 9599-рэ мэхъу. Ащ имызакъоу, сабыеу ны мылъкум исертификат къызэратыгъэм ыныбжь илъэсрэ мэзихрэ охъу­фэкIэ ахъщэр къыфэкIонэу щытыгъ. Джы а ныбжьыр илъэ­си 3-м нагъэсыгъ.

Адыгеим щыпсэоу ны мылъкум къыхэхыгъэ ахъщэ тыныр мазэ къэс къызыфакIорэр унэгъо 213-рэ мэхъу. Зэхэубытагъэу ахэм афатIупщыгъэр сомэ миллион 12 фэдиз.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.